Alonso a la chawl dawn lo

Fernando Alonso chuan tun season zawh hnu pawha Formula 1-ah la tlan chhunzawm zel a tum thu a sawi a, chawlh mai a la tum lo tih a sawi

Kum 2001-a F1 a luh ṭan hnuah, Alonso hian a season 23-na a hmang mek a, tunah hnaia harsatna tawk Aston Martin team-ah a awm mek. Kum 44 mi Alonso hian 2024 khan Aston Martin tan 'kum tam tak daih' thuthlung a lo ziak tawh a, mahse he inremna hian kum 2027 thleng a huam dawn em tih erawh team lam hian an la nemnghet lo thung.

Inrinni-a Grand Prix Historique de Monaco-a a thusawiah, Alonso chuan kumin season zawh hnu pawha la tlan chhunzawm a tum thu leh, a inpeih tawk nia a inhriat hun chauhva chawlh a tum thu a sawi a ni.

Alonso chuan, "Intlansiak hi nuam ka ti a, kum thum mi ka nihin ka vawi khatna atan ka intlansiak ṭan a, tunah kum 44 ka ni tawh. Ka dam chhung kum 41 zet hi steering hmaa ṭhuin ka hmang tawh tihna a ni. Chuvangin, he inelna hi ka chawlhsan a nih chuan, chu chu thutlukna harsa tak leh pawm harsa tak a la ni dawn.

Ka taksain a tlin tawh loh hun a la thleng ngei dawn a, a hunah chuan keimah ka hre mai ang. Mahse tunah chuan nuam ka la ti a, chuvangin tun hi ka season tawp ber tur a ni lo," a ti a, chawlh mai a la tum lo.

Kuminah an team-in harsatna tawk mah se, Alonso chuan Aston Martin hmalam hun atan beiseina sang tak a la nei reng a, Season ṭan hmaa test an neih lai pawhin an car chak tawk lo tih hre reng chungin, an ruahmannaah rinna a la nghat tlat tih a sawi.

Alonso chuan hemi chungchang hi sawiin, "Formula 1-ah kum 30 chuang zet he sport-a lo awm tawh Newey (Aston Martin principal) kan nei a, chuvangin hun eng emaw hnuah chuan car ṭha ber kan la nei ngei dawn. Hun duh deuh hlek mah se, a hma thei ang bera neih chu kan duh a ni," tiin a sawi.

Alonso hi a 2027-ah a chawl a nih chuan, Aston Martin an chet ṭhat tawk loh avangina thlaktu tur, hming langsar tak zawn hmu chu thil harsa tak a ni dawn.