World Cup hmain Modric dam hman dawn

Croatia coach Zlatko Dalic chuan an captain, Luka Modric chu inhliam mah se World Cup-ah an ram kaihruain turin a dam hman a beisei thu a sawi.

Kum 40 mi Modric hi Pathianni zana Juventus nen an inkhelh khan, Juve midfielder Manuel Locatelli nen an intauh palh a, Modric hian a biang vei lam ruh a ti tliak palh. Croatian midfielder hi hlawhtling taka zai a nih thu AC Milan medical team chuan an sawi.

Dalic chuan, "Luka hi ka lo be tawh a, chak taka a lo dam leh vat nan duhsakna ka hlan a ni. World Cup-ah chuan a theih tawp a chhuah dawn tih ka hria a, keini lam pawhin kan thlawp tlat dawn a ni. A dam lehna hi ruahman lawk ang thlapin a kal chho ang tih ka ring tlat a, Luka hian team captain a nihna angin kumin nipui tournament lianah hian min la hruai leh ngei ang," a ti.

Modric hi Serie A-a an match hmabakah a inlan a rinawm tawh lo a, World Cup-ah erawh a hmel hmuh a beiseiawm. Croatia hian an match hmasa berah England an hmachhawn nghal dawn a, an World Cup zinkawng a awlsam dawn loh avangin, team khaipa Modric a dam ṭhat a pawimawh dawn.