Wolves ngam loh Jokic-a Nuggets

Denver Nuggets chuan nimin zing khan, playoff game 5-ah 125-113 in Minnesota Timberwolves an hneh a, Nikola Jokic chuan triple double siamin a team chak nan a thawh hlawk hle. Wolves hian 3-2 in hma la hruai mah se, Nuggets-in lehthal thei turin beiseina sang tak an nei.

Ball Arena, Denver-a inkhelah Nuggets-in bul an ṭan ṭha a, first quarter-ah point 34-29 in hma an hruai a, an kut a kal nghal hle. Second quarter-ah Nuggets an che ṭha chhunzawm a, Wolves-in rawn hnaih deuh ṭhin mah se Jokic leh Jamal Murray te hmangin an chhang let thei zel a, 60-51 a hmahruai chungin halftime an hmang.

Third quarter-ah Nuggets bawk an che ṭha a, point 37 zet score-in an hmahruaina pawh 97-75 in an tizau. Quarter tawp berah theihtawp chhuahin Wolves an ṭang a, point 38 zet score mahse quarter danga an score tlem chu an tuar a, a tlawm zawkah an ṭang a, Nuggets-in Game 5 an la.

Nuggets tan an thiampuipa Jokic a langsar a, Serbian center hian point point 27 leh assist 16 neiin, rebound vawi 12 zet a la bawk a, a career-ah triple double 198 a siamna niin Russell Westbrook (209) chiah tluk loh a nei. Jokic bakah Jamal Murray (24), Spencer Jones (20) leh Cameron Johnson ten Jokic an thlawp ṭha a, Nuggets chak nan an ṭangkai takzet.

Wolves tan Julius Randle-a'n point 27 neiin a score hnem ber a, Ayo Dosunmu (18) Bones Hyland leh Terrence Shannon Jr. (15) te khel chhe lo mah se, Nuggets chet ṭhat zan an tawng a, an chak zo lo. Wolves tan Anthony Edwards leh Donte DiVincenzo te chu game 4-ah an inhliam avangin an inlan thei lo a, Edwards hi round 1-ah a inlan a rinawm tawh loh.

Edwards tel loin Wolves an ṭha tawk lo a, mahse Nuggets tan power forward Aaron Gordon a inlan bik loh avangin chhuanlam atan a tling lo. Nuggets leh Wolves hian April 30, Ningani zingah game 6 an khel leh dawn a, Wolves tan vawi khat chak a tawk laiin Nuggets tan chak ve ve a ngai tawh dawn.