Zaninah Aizawl FC hmaah Punjab FC

Mizoram Premier League champion Aizawl FC chuan zanin dar 7:00 hian I League match khel turin Punjab FC an mikhual dawn. Kumtharah fixtures hautakin Mizo club a hmuah dawn avangin AFC tan chak loh a thiang lo. 

Hmarchhak club zinga I League champion hmasa ber leh awm chhun Aizawl FC hian mahni muala league match hnih an khelh tawh aṭangin point hnih chiah an la nei a, mahse an club hmachhawn hi Mohun Bagan leh champion lai Chennai City an nih avangin fans-in an hrethiam. 

Zanina an hmachhawn tur Punjab FC hi team ṭha tak ni mah se fan-ten chak loh an hrethiam tawh lo ang tih a chiang a, RG Stadium-a fans ko khawm zel turin Aizawl FC-in khelmualah hnathawh tur an nei. Aizawl FC coach Standly Rosario chuan, "Tun season-a kan inkhelh dan en ula, Punjab nen hian kan intluk tawk hle. Inkhel hmuhnawm tak kan chhawp chhuak ang tih ka ring a, ka naute an inring tawk a, inkhelh an châk tawh hle a ni," tiin Vang­laini a hrilh. 

Aizawl FC-in team ṭha zawk chhawpchhuah an tum a, Standly chuan Ghanaian defender Joseph Adjei chu Mizo club tana inkhel tura a inpeih tawh thu a sawi. 

Kum 24 mi defender hian Nilaini khan club training a zawm ṭan a, season hmasaa Bahraini Premier League Malkiya Club tana khel centre back hi a chhe lo ang tih a rin theih. Hetihlai hian Malian striker Abdoulaye Kanoute chu dam lohna avangin chhawr theih a la ni lo a, an match hnuhnung pahniha goal khungtu Kolasib tlangval William Lalnunfela a awm avangin AFC tan hnualna tur niin a lang lo. 

Attacking midfielder Amadou Alou Sissoko bawk chu William nen inkawp leh tura ngaih an ni a, Isak Vanlalruatfela leh Rochharzela an awm bawk avangin AFC tlarhma an ṭha tawk. 

Minerva Punjab tia hriat hlawh ṭhin club khan tun season-ah Punjab FC tiin an hming an thlak a, an match hnuhnung pahnihah Chennai City leh Indian Arrows an hneh avangin an phur vanglai tak a ni. Punjab FC coach Yan Law hi kum 26 mi lek a ni a, Indian coach zinga AFC A licence nei thei naupang ber a nih bakah I League-ah ani aia coach naupang an awm lo a, Mizoramah pawh a mikhual lo.

Law chuan, "Engtiklai pawhin point thum hmuh tumin ka khel ṭhin a, a aia point tlem zawkin ka rilru a luah ngai lo. Aizawl FC hi team ṭha tak an ni a, mahse point thum kan hlawh chhuah ngei ka beisei," tiin Vanglaini a hrilh. 

Player a nih laia India Under 19 tana Jeje Lalpekhlua leh Lalrindika Ralte te nena lo khel ho tawh Law hian Punjab club chu I League nomawi chawipui a tum thu a sawi a, "Ka tum tihlawhtling tur chuan chak zel a ngai a ni," a ti. 

Punjab FC-ah Mizo tlangval pahnih an awm a, Electric Veng tlangval Lalrin­chhana leh Bawngkawn tlangval Imanuel HS  Lalṭhazuala te chu Punjab club lamah hian an khel. Rinchhana leh Imanuel-a hi Aizawl FC tana lo khel tawh ve ve an ni a, Mizoram Premier League lamah Chhinga Veng FC leh Chanmari FC tan an lo khelh tawh bawk avangin RG Stadium-ah an inthlahrung lo ang. 

Mizo midfielder ṭha Rinchhana chuan, "Natural grass-ah kan khel ṭhin a, kan ṭhiante tan chuan phul lema inkhelh hi a harsa mai thei. Mahse, theihtawp kan chhuah dawn a, point thum chiah kan ngaihtuah," a ti. Punjab hian Kerala Blasters defender hlui Samuel Shadap, tawnhriat nei ṭha Sanju Pradhan, Blackburn Rovers academy chhuak Jay Hart, Liberia international Teah Dennis Jr. leh Brazilian defender Danilo Quipapá te an nei a, a tawi zawnga sawiin team ṭha ta, champion tum ngam an ni. 

Standly Rosario chuan Mizo fan-te inkhel en turin a sawm a, "Kan tan chuan player 12-na an ni a, anmahni vangin Bagan leh Chennai City lakah pawh kan khel ṭha tih ka chiang a ni. "Aizawl FC hi Mizoram ta a ni a, in mi ṭawiawmna ka mamawh takzet," tiin Mizo mipui inkhel en turin a sawm.

Aizawla krismas bazara zin mekte tan pawh RG stadium floodlight êng hnuaia I League match enna remchang a ni - zan-inah Mizo club-in i puih a mamawh.