Russia-in hremna khing lêt dawn
Damdawi hman phal loh hman ruk vanga hremna tawk Russia chuan an chunga hremna lekkawh lai chu khin let ngei an tum a; an ram president Vladimir Putin chuan an infiammite'n an hnam puanzar hnuaiah ngei inelna an hmachawn theih nan hma an lak tur thu a sawi.
Tun hnai maiah World Anti-Doping Agency chuan Russia hi kum li chhung atan an hrem thu an puang a, hremna hi kaltlangpui a nih chuan nakkuma neih tur Tokyo Olympic leh 2022 World Cup atan pawh an buai dawn tihna a ni.
Rio Olympic dawnah pawh khan Russia hian hremna ni an lo hmachhawn tawh, khami ṭum khan International Olympic Committee chuan dan leh hrai an zam zawm famkim thei leh infiammi fihlimte chu neutral athlete angin an inlan an lo phalsak tawh.
Tun ṭuma hremna pawh hi infiamna lam thubuai ngaihtuahtu sang Court of Arbitration for Sport (CAS) hnenah khinlet theih a la ni a, an chunga hremna hi Russia chuan an theihtawpa khinlet an tum hi an tih awm tak a ni.
Russia president Vladimir Putin chuan, “Hrem ngai leh hrem tur an awm a nih chuan mimal thil a ni tur a ni ang, ram anga inhremna chiah ka ngai lo. Kan infiammi tam tak dik leh dan bawhchhiatna lama fihlimte hi ram nei lo ang maia an awm ngawt chu a dik bik lo a ni,” tiin a sawi.
Kum 2014 daih tawh khan Russia hian Winter Olympic a thleng a, Sochi khawpuia infiamna khawmpui lian an thlen ṭum hian an ram sorkar hriatpuina ngeiin an dan an bawhchhia. Chumi hnuah Moscow-a laboratory ṭhenkhat chu endik tur ni mah se he hmuna an thil neih tak tak chu endik theih loh tura tihchhiat a ni - hei vang hian hremna hi an hmachhawn nawn leh a ni.