El Clasico-ah chak zawk awm lo

Spanish football-a match ngaihhlut hlawh ber El Clasico chu Nilaini zan khan khelh a ni a, chak zawk awm loin an ṭin. 

Nou Camp-a inkhelah Barcelona-in goal an khung thei lo a, Real Madrid an danglam lo. Tun hnai kum engemaw zat chhunga El Clasico hmuhnawm lo bera chhal ngam a ni a, hei hian tun hnaia club pahnih dinhmun chiang takin a hrilhfiah tel nghal. 

Real Madrid tan Gareth Bale chuan he inkhela goal awmchhun a khung niin a inngai a, mahse left-back Ferland Mendy chu a lo offside avangin goal-ah pawmsak a ni lo. Barcelona-in tun season-a match 17-a khelha goal 14 khung tawh Lionel Messi an nei a, Real-in a match hnuhnung pariata goal kua khung thei Karim Benzema an nei thung. 

Club pahnihin tlarhmaa player an neih dan enin goal lut ngei tura ngaih a ni a, mahse November 2002 hnua El Clasico-a goal luh lohna hmasa bera inkhel kan hmu ta zawk. Antoine Griezmann-a'n Lionel Messi tana a siamsak chu Argentine forward hian ṭum danga a khung ṭhinna angah a khung thei lo a, Benzema-a'n first half-a yard 20 vel aṭanga shot a nei tih loh chu chance duhawm a nei meuh lo. 

Barca-in a bik takin first half-ah beisei a phak lo a, Athletic Bilbao, Granada leh Levante laka lo tlawm tawh team hian league match thuma an tlawm tawh chhan an pholang a ni ber. Real tan Casemiro-a tauh goal ngei tur nia lang chu Gerard Pique chuan a lo pet chhuak hman a, Real tana khel ṭha tak Federico Valverde-a volley chu goalkeeper Marc-Andre ter Stegen chuan ṭha zetin a lo dang bawk. 

Messi tan zan hriatreng tlak a ni lo a, a chance neih chu El Clasico-a inlan hnem ber record siamtu Sergio Ramos (43) chuan a lo pet chhuak hman. Goal lut loin inkhel a tawp a, La Liga table chung lamah point hmuh in angin team pahnih an awm chhunzawm zel - team pahnih hi October 26 khan inhmachhawn tura tih an ni a, mahse Catalonia buaina avangin Nilaini zanah hian sawn a ni a, league match dang a awm lo.