A tawpah Bayern an vannei

Nilaini zan khan Bayern Munich chu chak zo lo mai dawna an lan hnuah an vannei hlauh. German champion hian minute 90 liam hnuah goal hnih khungin Freiburg chu 3-1 in an hneh.

Mikhual Bayern tan hian Alphonso Davies thawhrah sengin Robert Lewandowski chuan minute 16-naah goal hmahruai a khung. Second half-ah Freiburg tan Vincenzo Grifo chuan Janik Haberer-a ball pek chu a khung. Beisei anga season hmang ṭha lo Bayern hi khualmualah an chak zo lo dawn ngei niin a lang hman. Mahse, Serge Gnabry chuan minute 90+2-ah Joshua Zirkzee goal khungtur a siamsak a, Arsenal player hlui hian hun tawp hma chiahin an goal thumna a khung chhunzawm bawk.

A zawna season sarih chhung Bundesliga champion ni tawh Bayern hi match 16 aṭangin point 30 an nei a, table-ah pathumna dinhmun an luah; palina Borussia Dortmund nen an point neih a inzat. An chungah RB Leipzig leh Borussia Monchengladbach te an awm.

League hmahruaitu Monchengladbach hian Alassane Plea-a goal leh Lars Stindl penalty chhuih luh hmangin Paderborn 2-0 in an hneh. Schalke erawhin Dortmund leh Bayern kalsan theihna hun nei mah se Wolfsburg nen 1-1 in an inhnehtawk a, panganaah an awm leh rih.