MBOCWWB ADFA Inter Village Football : BVT hmaah Bawngkawn West; Salem Veng khingpui tur Kulikawn

MBOCWWB ADFA Inter Village Football Tournament-ah champion rinkai zinga mi Bethlehem Vengthlangin vawiin chawhma dar 11:00 hian Bawngkawn West an hmachhawn ang a, chawhnu dar 2:00-ah Salem Veng leh Kulikawn te an inkhel chhunzawm ang.

BVT fiahna

Bethlehem Vengthlang tan Bawngkawn West hi fiahna hautak tak tur a ni lo a, mah se Bawngkawn West hian Durtlang an hneh tawh avangin BVT tan fimkhur a ṭul thung ang. CYMA Football 2025 finalist hian ISL leh Indian Football League vangin player pawimawh chan nual mah se champion tura rinkai zingah an tel pha tho.

BVT hi tawnhriat nei ṭha Lalrammawia'n a ho a, team ṭha Electric Veng an hneh ṭum pawhin goal awmchhun a khung. Midfielder Emmanuel Lalṭhazuala'n tawnhriat a ngah tawh a, kum lama la upa lo mah se K. Lalramzauva ten an thlawp ṭhat bawk avangin Ema hi team khaipa a ni ṭan der tawh.

Chutihrualin Bawngkawn West hi Durtlang hneh thei an ni ringawt lo a, an muala Durtlang 6-2 a hnehtute an nih avangin BVT lakah pawh an inrintawk phah dawn. Tualchhung football-a tawnhriat nei ṭha Lalnuntluanga'n a la ho peih a, Durtlang laka hattrick siamtu Obadia Ramtleizuala leh goal khungtu James Lalruatmawia te tan hming chherna hun ṭha a ni thei ang.

Team ṭha Salem Veng

Salem Veng hi tun hnaiah team ṭha ber zinga mi an ni a, champion pawh ni se thilmak a ni lo ang. Tualchhung football-a forward ṭha pahnih David Lalchhuanawma leh Lalnunzira te an awm a, match hnuhnung berah pawh Sakawrtuichhun 4-0 in an hneh.

Hei chauh hi a ni lo a, RG Stadium hi Salem Venga awm a nih avangin an tlangnel a, ṭantu an nei ṭha tura ngaih an ni bawk. Kulikawn hian tun hmain team ṭha an nei ṭhin a, tunah erawh an tlahniam ve ta hle.

Tun ṭum inelnaah hian Kulikawn hian Bungkawn 4-0 in an hneh tawh a, MPL club nei Kanan 3-2 in an hneh leh bawk. Match hnih an khelh tawhah goal khung hnem mah se Salem Veng anga team ṭha an la hmachhawn lo.