Hmawngkai Derby-ah Republic Veng

MBOCWWB 8th ADFA Inter Village Football Tournament-ah Republic Veng chuan an veng ṭhenawm Venghlui 10-0 in an sawp. Hmawngkai Derby-ah coach Lalsangzuala Hmar enkawl Republic Veng kawng engkimah an chungnung a, hnehna chang turin harsatna an tawk lo.

RG Stadium-a inkhelah ruahsur vangin inkhelh ṭantir lam chawlh a ngai a, goalkeeper chesual vangin F. Lalrinpuia'n minute 18-naah goal hmahruai a khung. Defender tihsual vangin K. Lalhmangaihkima'n minute 18-naah a khung belh a, Laltluangliana'n minute 38-naah ṭha zetin a tauh lut a, hun rei lote hnuah H. Lalfakzuala'n box chhungah a awm hmanga la thlain kawh zetin a volley lut.

First half-ah goal li a lut a, second half-ah goal ruk dang a lut. Captain Lalnunzira a che ṭha a, minute 47-naah freekick aṭangin mawi zetin a pet lut. Rawlthar duhawm Joseph C. Lalmuankima a rawn inlar a, Muantea hi kum lama a la nau deuh avangin CYMA Football champion ṭumah tel lo mah se kum khat hnuah team-ah rawn telin Hmawngkai Derby-ah hattrick a siam.

CYMA Football-a player pawimawh Vanlalkrosschhuangzela Ralte pawhin goal a khung a, reinforce hmanga lakluh Vanlalthlanga pawhin goal a khung ve bawk. Republic Veng 10-0 a hnehna changin quarterfinal an lut a, football thiam veng an ni tih an nemnghet.