Juventus leh Ronaldo an zuang sang

Cristiano Ronaldo-a'n sang taka zuang chungin Juventus chakna goal a tauh lut a, Italian champion hian Sampdoria chu 2-1 a hnehin Serie A hmahruaitu an ni leh ta. Inter Milan aiin match khatin an khel hnem thung, manager Antonio Conte naute hi a chung bera awm leh thei dinhmunah an la ding tihna a ni.

Nilaini zan inkhelah Juve tan hian Paulo Dybala-a'n goal hmahruai a khung chu Gianluca Caprari-a'n a sut a, chawlhlawk hma deuhin Ronaldo chuan boruakah sang taka zuang chungin goal ṭha bik a tauh lut. Mualneitu Sampdoria tana goal khungtu Caprari chu hun tawp hma deuh chiahin hnawhchhuah a ni, tho chhuak tur an awm tawh lo. Sampdoria hian match 17 aṭangin point 15 chiah an la hmu a, 17-naah an tlahniam.

Ronaldo goal khungin sawizui a hlawh a, keeper Gianluigi Buffon tan pawh inkhel chhinchhiah tlak a ni. Italian legend hian Serie A match 647 a khel tling ta a, Italian fotball inelnaah hian Paolo Maldini nen match khel hnem ber an ni ta - Buffon hian a khum ang.

Kum 41 mi Buffon hian Parma aṭangin bul a ṭan a, UEFA Cup leh Coppa Italia a chawi hnuah Juventus a pan. Turin-ah hian Serie A nomawi chauh pawh vawi kua a chawi tawh, Coppa Italia-ah vawi li champion bawkin Champions League-ah erawh final lut mah se a hlawhtling lo thung.

Season hmasa khan Paris St-Germain lamah a kal a, Paris club tan hian Ligue 1 nomawi chawi mah se nipui bazar lai khan Juve lamah bawk a kir leh. Italy tana World Cup champion ni tawh hian sulhnu ropui a la ziak zel dawn niin a ngaih theih.

Juventus manager Maurizio Sarri chuan, "Goal ṭha tak pahnih kan khung a, a bik takin Ronaldo goal kha a mak hle, goal khung tur khan boruakah khan hun eng emaw ti chhung chu a ding deuh det ni maiin ka hria.

"Result kha 2-1 a ni, awlsam taka hnehna chang kan ni lo tih chu a hriat theih. Ka naute khelh danah ka lawmin an rilru put hmang pawh a dik hle, midang inkhel ngaichang loin keimahni lam kan in ngaihtuah ang," a ti. Serie A match 647 kheltu Buffon chuan, "Thlawpna leh lawmpuina duhawm tak tak ka dawng hnem a, khangte khan nun hi a ti nuam ṭhin. Club ṭha tak ka nei a, Turin club hian ka mamawh ang zawng zawng chu min pe a ni," tiin a sawi.