Ramhlun South-in quarterfinal an lut

MBOCWWB ADFA Inter Village Football Tournament 2026-ah Ramhlun South-in nimin tlai khan Vanlalrinchhana goal hmangin Saikhamakawn 1-0 in an hneh a, quarterfinal an lut. Tun ṭum inelnaah hian quarterfinal hi pawh ṭhat leh tur a ni.

Ramhlun South tan Malsawmfela a la khel a, captain armband hrengin tawnhriat nei ṭha Lalremruata (Bata) leh Lalmawizuala ten an la telpui bawk. Tun hnai veng leh veng inelnaah Ramhlun South an che chhe ṭhin a, hei vang hian vengchhungah football tournament siamin a rah duhawm tak an seng chho mek.

Nimin inkhelah hian Ramhlun South leh Saikhamakawn te an inhnehtawk a, goal chance hmuh tur pawh a awm meuh lo. First half-ah goal a lut lo a, team pahnih an inhnehtawk avangin inkhel a thi hle.

Second half-ah pawh inkhel a nung tawk lo a, hun tawp lamah goal chance hmuh tur a awm chho ṭan. Hun tawp lamah Saikhamakawn an khel ṭha hret a, left winger Siamthara'n a chance ṭha neih chu ṭhiante pass aiin goal-a pet a thlang a, goal zawnah a pet lo. SKK tan minute 81-naah Malsawmtluanga'n a khung a, offside vangin pawm a ni lo. Replay aṭanga en nawn pawhin thil thlen dan hi hriatthiam a har a, Ramhlun South an vannei a, SKK an vanduai.

Minute 87-naah Ramhlun South an vannei a, goal kick aṭanga ball chhuak chu Saikhamakawn defender Ropuia'n a lu hmanga keeper pass tum a, a tisual. Ramhlun South tan Remruata chak takin a rawn tlan lut a, keeper Mama rawn inrawlh hman mah se a per chu Rinchhana zawnah tak a kal a, Ramhlun South midfielder hian goal ruakah a khung.

Injury time-ah Ramhlun South zawkin goal khungna chance an nei a, Remruata cross chu substitute Lalawmpuia'n goal ban tih per nan a hmang a, goal dang hmuh tur a awm ta lo. Coach Lalnunmawia kaihhruai Ramhlun South 1-0 in an chak.