Season tawpah Stones a chhuak dawn

England defender John Stones chuan season tawpah Manchester City a chhuahsan tur thu a tichiang a, City-ah a duhthusam leh a châk berte a tihpuitlin vek thu a sawi bawk.

Kum 31 mi Stones hian kum 2016 khan Everton aṭangin £47.5mtd-in City hi a zawm a, match 293 khelhsakin Premier League-ah vawi ruk a champion a, Champions League, FIFA Club World Cup leh UEFA Super Cup nomawi a chawi a, FA Cup-ah vawi hnih a champion a, League Cup-a vawi nga a champion bakah Community Shield-ah vawi thum hnehna a chang bawk.

Stones chuan, "Helai hun hi kum 10 chhung ka in ang maiin ka khawsa a, tunah chuan kum khuaa ka in a ni tawh dawn. City ka zawm khan naupang mai ka la ni a, tunah chuan puitling ka ni tawh. Ka duhthusam leh ka châk berte ka tipuitling vek a ni," tiin a sawi.

England defender hi Barnsley khaw chhuak an ni a, an khaw club Barnsley-ah bul ṭanin kum 2013 khan Everton a zawm. Toffees tan Premier League-ah match 77 khelin goal khat a khung a, City hian a hun laia khawvel defender manto ber dawttu ni turin an lalut.

Stones chuan, "Ka bul ṭantirh khan tun anga ka hlawhtlin hi ka ring lo. Pep Guardiola nen hun rei tak kan hmang dun hi ka lawm a, ani tel lo chuan tun dinhmun hi ka thleng lo. Ka chunga a ṭhatna avangin a chungah ka lawm takzet," tiin Spanish manager Pep Guardiola a fak.

Nikum nipui khan Kevin de Bruyne, Kyle Walker leh Ederson ten City an chhuahsan a, kumin June thlaah Stones bakah captain Bernardo Silva ten an chhuahsan dawn.

Hliam vangin Stones hian a thlen tur ang thleng pha lo mah se City ṭantute tan chuan legend a ni reng ang. City tan defender nichugnin goal 19 a khung a, chung zingah chuan August 2024-a Arsenal laka siphurh sutna a tel a, 2018-19 season-a Liverpool nen nomawi inchuha an inum ṭuma goaline aṭanga a petchhuahte chu theihnghilh theih a ni tawh lo.

City-in 2023 khan treble champion an ni a, Champions League final-ah Inter Milan hnehin Stones hi midfielder angin an khel a, a khel ṭha takzet. Pep Guardiola hnuaiah Stones hi player langsar ber a ni lo a, mah se tun ang hlawhtlinna an channa kawngah Stones hi a pawimawh hle.