Hmai hup vangin red card hmuh theih

Kumin FIFA World Cup-ah player-ten an hmai hupa an khingpuite an ṭawng khum a nih chuan red card an hmu thei dawn. Thawhlehni khan Vancouver, Canada-ah International Football Association Board (IFAB) ten special meeting an nei a, thutlukna hi an siam.

Hmai hup bakah hian referee thutluknaa lungawi loh vanga khelmual an chhuahsan a nih chuan red card hmuh theihna a ni bawk dawn. Thutlukna pahnih hi tun hnaia thil thleng vanga siam a ni.

Kumin February thla khan Champions League-ah Benfica winger Gianluca Prestianni chuan hmai hup chungin Real Madrid forward Vinicius Jr a ṭawngkhum. Argentina international hi vun rawng vanga hmusitna ṭawngkam hmangah puh a ni a, match khat hrem lailawk a ni.

UEFA chuan zirchianna nei zuiin vun rawng lam ni loin mipat hmeichhiatna lam a ni tih hmuhchhuah a ni a, vun rawng vanga hmusitna chu match 10 hrem tur a ni. Mipat hmeichhiatna lam ṭawngkam erawh hremna a nep hret a, match ruk atan hrem a ni ta thung.

UCL-a thil thleng avangin dan thar a chhuah phah a, FIFA World Cup-ah hman a ni dawn. Kumin January 18, Pathianni khan Africa Cup of Nations final khelh a ni a, referee-in inelna thlengtu Morocco penalty a pek avangin Senegal lungawi loin khelmual chhuahsanin dressing room-ah an kir. Mahse, player-te hi an let leh ta tho a, Brahim Diaz-a'n panenka hmanga petin goalkeeper Edouard Mendy-a'n a dang.

Senegal hi 1-0 a chak zuiin champion mah se Confederation of African Football (CAF) chuan March 18, 2026 khan Morocco chu champion-ah an puang. CAF thutlukna hian sawisel a hlawh hle. World Cup-ah erawh player-ten khelmual an chhuahsan a nih chuan red card an hmu dawn a, player-te chhuak tura fuihtu coaching staff-te pawh hrem theih an ni ang.

FIFA World Cup hi June 11, Ningani zan aṭanga khelh ṭan tur a ni a, a vawi khat nan ram 48 an inel dawn. Final hi July 19, Pathianni zanah khelh a ni ang a, ram pathum Canada, Mexico leh United States ten inelna hi an thleng ang.