Antonelli nen kan inkar a ṭha - Russell

Mercedes driver George Russell chuan a teammate, Kimi Antonelli nen an inkarah buaina a awm loh thu a sawi a, thianghlim taka inel an nih avangin an boruak a ṭhat thu a sawi.

Tun season-ah Mercedes driver pahnih hi an che ṭha a, Australian Grand Prix-ah Russell hian hnehna changin, Chinese leh Japanese GP-ah Antonelloi a chak ve thung a, Antonelli hian Russell lakah point kuain hma a hruai mek. Driver pahnihte hi Pathianni zana neih tur Miami GP-ah pawh mipui en bik an ni leh dawn.

Russell chuan, "Antonelli nen kan inkar boruak a ṭha a, kan inelna avang hian buaina kan nei lo. Chutiang thil chu sawi pawh kan sawi chhuak ngai lo. Professional kan ni a, teammate kan nih bawk avangin inelna thianghlim neih hi kan duh ber a ni," a ti.

Antonelli hi Chinese GP-a hnehna a chan khan, kum 19 leh ni 202 a upa a ni a, Formula 1 chanchina chak thei naupang ber dawttu niin Max Verstappen chiah a tluk lo. Italian driver hi Japanese GP-ah hnehna a chan leh khan championship hmahruaitu a ni.

Japanese GP zawhah Russell erawh a dinhmunah a lungawi lo hle a, Piastri leh Ferrari driver Charles Leclerc-te dawtah palina niin, thil thlen dan chu 'awihawm loh' tiin a sawi hial.

West Asia indona avanga Bahrain leh Saudi Arabia GP ṭhulh a nih hnuah, April thlaah intlansiak a awm lo a, Miami GP hi thla khat hnua neih leh a nih dawn avangin F1 ngainatuten an ngaihven.

Hei bakah hian sawiselna tam tak a awm hnuah, F1 chuan Miami GP aṭanga hman ṭan turin dan thar a duang leh a, season laklawh laia dan thar hman emaw an thlak vawi khatna a nih avangin sawi zui a hlawh hle.