Abraham leh Reece ten contract thar ziak duh rih lo

Premier League club Chelsea chuan an player ṭhangduang pahnih Tammy Abraham leh Reece James te chu contract thar ziahpui tum mah se an beisei angin inbiakna a kal hleithei lo niin English media ten an tarlang. 

Chelsea hian tun hnaiah player naupang rual Fikayo Tomori, Callum Hudson-Odoi, Mason Mount, Ruben Loftus-Cheek leh Billy Gilmour te chu contract thar an ziahpui a, mahse Abraham leh James erawhin awlsam taka contract ziah mai an tum lo. 

Kum 22 mi Abraham hian tun season-ah match 24 khelin goal 13 a khung tawh a, mahse Stamford Bridge-a cham tur chuan kar khata Hudson-Odoi hlawh zat £120,000 hlawh ve a phut niin an sawi. 

Abraham hian kum 2017 khan Chelsea-ah hian contract thar a lo ziak tawh a, kar khatah £50,000 a hlawh mek. Reece James hian nikum nipui lai khan Blues-ah hian kum li atan contract thar a ziak thung a, Wigan-ah loan-in a chhuak zui.  Tun season-ah Blues tan first choice la ni lo mah se inelna hrang hrangah match 16-a inlan tawh a, London club tan player pawimawh a la nih theih beisei a ni.