Ozil chungchangah Wenger a ṭawng chhuak

Arsenal manager hlui Arsene Wenger chuan a player enkawl ṭhin Mesut Ozil-a'n China sorkarin Uighur Muslim ho a sawisel chungchang chu Ozil mimal ngaihdan a nih thu a sawi a, "Arsenal ngaihdan a ni kher lo," a ti. 

Wenger chuan, "Ozil hian midang ang thoa a ngaihdan sawi turin zalenna a nei a, mi hriat hlawh a nihna chu remchangah hmangin a ngaihdan a sawi ve a ni mai a, mi zawng zawng ngaihdan a ni ta, tihna a ni hran lo. "A pawimawh ber chu Ozil hian a mimal anga mawhphurhna a nei a, Arsenal Football Club aiawha thupuangtu a ni lo. Mahni ngaihdan kan sawi a nih chuan a vuak let pawh kan tuar ngam tur a ni," tiin Ozil pawh a thusawi vanga beih a nih pawha pawmthiam turin a duh. 

Tlawmngai pawl tam tak chuan China sorkar hi Uighur Muslim ho an enkawl dan avangin an lo sawisel tawh ṭhin a, tun hnaiah khan China foreign ministry chuan Ozil chu thu puar pawleng mai maia buai niin an sawi thung. Hetihlai hian Muslim Council of Britain secretary general Harun Khan chuan Ozil-a hmalakna chu a fak a, hetihrual hian Arsenal-in an player thusawi an thlawp ngam lo chu a dem thu a sawi bawk.