Manchester United, City leh Foxes an tlang

Manchester United leh Manchester City ten an khingpui awlsam taka hnehin League Cup quarterfinal an paltlang a, Manchester club pahnih hi semifinal-ah an intawng zui ang. 

Everton leh an mi­khual Leicester City te 2-2 a an inhnehtawk hnuah Foxes lamin pe­nalty shootout hmangin 4-2 in hnehna an chang. Liverpool hnehtu Aston Villa leh Leicester te hian final hmun ruak pakhat an inchuh ve thung dawn a ni.

Pep Guardiola enkawl Manchester City hian tun hnaiah a zawnin season hnih chhung League Cup nomawi an chawi a, inelna neih hnuhnung parukah vawi li ngawt an champion thei - kuminah pawh rinkai ber an ni ang.

Champion lai City hian an player ṭha ṭhenkhat chhawr lo chungin Oxford United lakah harsatna an tawk lo. Joao Cancelo-a goal khung chu League One club lamin Matty Taylor hmangin sut ve mah se Raheem Sterling chuan goal hnih a khung belh.

City manager Guar­diola chuan, "Oxford khan an khel ṭha, min nawr ngam bakah hun ṭha pawh an insiam nual. Chutihrualin keini lam pawh kan khel ṭha, player naupang zawk ten ṭha taka an khelh hian a lawmawm ṭhin," a ti. City hian Inrinni zan hian Premier League lama an chunga awm Leicester City chu an hmachhawn zui leh ang. 

Manchetser United manager Ole Gunnar Solskjaer chuan Col­chester United 3-0 a an hneh thei chu a lawm thu a sawi a, League Cup-ah hian 2017 hnua a vawi khat nan semifinal an thleng ve leh chiah a ni.

United tan hian Mar­cus Rashford leh Anthony Martial ten goal khat ve ve an khung, anni pahnih goal khung inkarah hian League Two club player Ryan Jackson chuan anmah­ni lamah a ti lut bawk. Solskjaer chuan, "Inkhel thunun chungin goal thum kan nei a, hun ṭha kan insiam hnem hle bawk. Eng inelna pawh nise nomawi chawi kan duh," a ti. Semifinal-a an hmachhawn tur Man City chu tun dinhmuna English club ṭha ber an nih thu a sawi tel nghal zauh bawk a ni.

Everton-in an mikhual Leicester City lakah goal vawi hnih an phurh hnuah sut leh mah se an sut zo thei. Amaherawhchu, Toffees vanneihna hian tawp chin a nei; penalty shoot-ah 4-2 in an chak lo. 

Foxes keeper Kasper Schmeichel chuan penalty vawi hnih dangin striker Jamie Vardy-a'n chakna goal a khung. Leicester hian 2000 hnua a vawi khat nan final an lut a, final an luh hnuhnung ber hian an champion - kuminah chanchin ṭha neih leh an tum dawn.

Leicester manager Brendan Rodgers chuan, "Semifinal kan thleng a nih chuan eng team pawh hmachhawn ila a awlsam dawn lo, kan theihna zawng zawng senga kan khelh a ngai ang," tiin Villa an hmachhawn tur chung­chang a sawi lawk.