Monterrey hnehtu Liverpool-in final lut

Khawmualpui champion club-te inelna Club World Cup final-ah Liverpool an lut a, Nilaini zan khan CONCACAF Champions League champion Monterrey chu 2-1 in an hneh. 

Reds tana Naby Keita goal hmahruai khung chu Mexican club-in Rogelio Funes Mori hmanga an sut lehnghal avangin hun rei zawk chu team pahnih hi 1-1 in an inhnehtawk. Mahse, hun pek belhah team ṭha zawk danglamna a lang a, bench aṭanga luhtir Roberto Firmino chuan chakna goal a khung. Monterrey tan tho leh turin hun a awm tawh lo a, 2-1 in Liverpool an chak. 

Brazilian club ṭha Flamengo chuan semifinal hmasa zawkah Al Hilal hnehin final an lo lut tawh a, Inrinni zan dar 11:00-ah Reds nen hian world champion nih an inchuh ang. 

Liverpool-in game an ngah chho a, chumiin a ken tel chu player inhliam leh damlo a ni. Monterrey lakah captain Jordan Henderson chu centre back-ah Joe Gomez nen an din dun a ngai a, James Milner chu right back-ah chhawr a ni. Reds tan tlarhnung laia player pawimawh Virgil van Dijk chu dam lohna vangin a inlan thei lo a, Joel Matip,  Dejan Lovren leh defensive midfielder Fabinho te chu hliam vangin an inlan thei lo vek bawk!

Jurgen Klopp-a'n fimkhur a ngai tih a hai lo - Trent Alexander-Arnold, Sadio Mane leh Roberto Firmino te bench-ah a dah vek a, Qatar-a lawm hlawh tak Mohamed Salah erawh bul ṭantir a ni thung. Liverpool vanneihna chu counter attack hlauhawm tak titawp tura a chetnaa Joe Gomez-a'n yellow card chauh a hmu kha a ni a, Monterrey boss Antonio Mohamed chuan, "Liverpool jersey khan match official a tibuai a ni mai thei a, kei chuan red card awm turah ka ngai a ni," a ti. 

Inkhel ṭan aṭanga minute 11-na lekah Mohamed Salah chuan Naby Keita tan through ball duhthusam a pe a, Guinean midfielder hian a jersey rochun number 8 ha ṭhintu Steven Gerrard ang thoin goal khung a thiam tih pholan nan a hmang. Mahse, Liverpool hlim chhung a rei lo - minute hnih hnu lawkah tlarhnung phuahchawp an talbuai a, Rogelio Funes Mori chuan Mexican club tan si phurh a rawn sut nghal. 

North America champion tan Dorlan Pabon, Funes Mori leh Jesus Gallardo te chuan Reds tlarhnung an ṭhiat leh ṭhin a, Liverpool an talbuai. European champion tan Keita chuan chance vawi hnih ngawt second half-ah a neih belh a, mahse keeper Marcelo Barovero a paltlang thei bik lo. 

Klopp-a'n a player hahdamtir te luh hun a ni tih a hria a, December-a match khelh tur ngah Liverpool tan extra time khelh a hlauhawm tih a hai lo. Second half-ah Arnold, Sadio Mane leh Firmino te a luhtir a, hun pek belhah a subsitution siam fuh man a tel. Ball pet thiam bik Alexander-Arnold chuan Firmino tan a siamsak a, Brazilian forward hian Reds chakna goal a khung. 

Liverpool tan goalkeeper Alisson Becker chu player langsar a ni a, VVD tel lohna Reds tlarhnung a nghing tih hai rual a ni lo. Liverpool manager Jurgen Klopp chuan, "Kan mamawh chhanna chu Alisson Becker a ni," a ti! Klopp chuan, "VVD chungchang ka la hre rih lo a, mahse a dam ṭhat vat ka beisei. Squad-ah player naupang an awm nual a, kan hman zel dan tur chu kan la thlir ang chu," tiin a sawi.