Liverpool tana khel tur Minamino a chiang ta

Club World Cup khel mek Liverpool-in khelmual pawn lamah pawh chanchin lawmawm an neih belh zel a, January 1 aṭanga an player ni turin winger Takumi Minamino chu Red Bull Salzburg aṭangin an lalut. 

Japan international hi a contract-ah chuan pound maktaduai 7.25-a lakchhuah theih a nih thu ziah a ni a, Reds hian heti zat sum hi an sengah ngaih a ni. Anfield-ah kum li leh a chanve khel turin contract a ziak a, kum 2024 nipui thleng Merseyside club-ah a khel dawn tihna a ni. 

Kum 24 mi forward chuan, "Liverpool player nih hi ka duhthusam a ni a, ka lo mangphan ṭhin ram kha a ni. Premier League-a khelh hi ka tum ber pakhat a ni a, ka ngaihdan chuan khawvela league ṭha ber a ni. 

"Beisei anga engkim a kaltluan chuan tiin Premier League-a khelh hi ka lo suangtuah tawh ṭhin a, mahse Liverpool ang team ṭha tana khelh erawh ka ngaihtuah ngam lo. Ka phur tawh takzet a ni," tiin European champion a zawm thei chu a lawm thu a sawi. 

Liverpool-a jersey number 18 ha tur Mina­mino hian tun season-ah Salzburg tan match 22 khelin goal kua a khungsak tawh a, vawi 11 assist a nei bawk. Reds boss Jurgen Klopp chuan, "Takumi hi player che rang leh fing tak a ni a, hmun awl a insiam thiam a, ball a ken lai leh ken loh lai pawhin a huaisen em em a ni," tiin a player thar chu a fak.