Zanin dar 6:30-ah NorthEast Derby Shillong Lajong FC vs Chanmari FC
Indian Football League-ah zanin dar 6:30 hian Shillong Lajong-in Chanmari FC an mikhual dawn. Lajong hian RG Stadium-ah Chanmari hi 2-1 in an hneh a, an mualah Aizawl FC 6-1 in an sawp. Tun ṭum hi tun season-a NorthEast Derby vawi thumna a ni a, MPL12 champion hian Lajong lakah phuba lak an tum ang.
Intawn vawi khatna
March 19, Ningani khan Chanmari FC-in Lajong hi an mikhual a, hemi hma hian Mizo club hian hneh loh an la tawng lo. Gokulam Kerala nen goal awm loin an inhnehtawk a, Sreenidi Deccan 2-1 in an hneh a, Dempo SC lakah inkhel thunun mah se 2-2 in an inhnehtawk. Mizo club-in result ṭha an neih avangin an inringtawk a, chak ngei turah an inngai.
NorthEast Derby-ah Chanmariin inrintawkna nen bul an ṭan a, Christopher Kamei-a'n goal hmahruai khungin bul pawh an ṭan ṭha. Mahse, Lajong hian first half leh second half injury time-ah Phrangki Buam hmangin goal an khung a, 2-1 in an chak ta daih.
Chanmari coach Victor Lalbiakmawia'n Mizo Derby-ah a club hlui Aizawl FC a hneh loh avangin a hna a chan phah zui a, Lajong erawhin result nei ṭha chhunzawmin champion an beisei pha hial.
Boruak a dang ta
MPL12 champion Chanmari hi Dipankur Sharma-a'n a enkawl tawh a, IFL khel zel turin an him tawh. Mizo club tan champion a harsa tawh a, chuvangin an match hmasa bera Diamond Harbour an hneh loh ṭum pawhin an la na tawk lo. Mahse, Lajong erawh an hneh a ṭul a, Mizoram football aiawh an nih avangin an tlawm thiang lo.
Chanmari coach Dipankur Sharma chuan, "Chak turin ka tiam thei lo a, mah se Mizo club leh Shillong Lajong inkhel ka en ve ve a, chak tura ka ngaih zawk an chak lo. Mizo mipuite tawrhna ka hrethiam a, chak tumin kan khel dawn," tiin Vanglaini a hrilh.
MPL12 champion hian chak tumin Lajong hmachhawn dawn mah se Shillong club hi an phur vanglai tak an ni a, khelh an harsa dawn a, tun hnaia an khelh dan thlirin chak tura rinkai zawk pawh an ni. Lajong hian khelh dan nghet an nei a, an goal bawh a na a, Chanmari lamin tlarhnung an tihphui ṭhat a ṭul dawn.
Mizo tlangval pahnih Jakob Vanlalhimpuia leh Ephraim Lalremtluanga te telna Lajong hian champion an tum a nih chuan Chanmari an hneh ngei a ṭul a, inkhel hmuhnawm a beisei thei ang. Inkhel hi Sony Liv, Waves App leh DD Sports-ah te a en theih ang.