Poch-a'n Spurs a khawngaih

Tottenham Hotspur manager hlui Mauricio Pochettino chuan tun hnaia tla chhe tak, a club hlui Spurs dinhmun chu a khawngaih thu a sawi a, "An tuar lai hmuh hi nuam ka ti lo hle a ni," a ti - London club hi Premier League aṭanga relegate thei dinhmunah an ding mek.

Poch chuan, "Tottenham hi ka hmangaih takzet a, ka nunah hian hmun pawimawh tak an chang a ni. Coach ka nih avangin hmun pawimawh an chang a ni mai lo a, ka rilruah hian an awm reng ṭhin a ni," a ti.

World Cup 2026-a USA kaihruai tur Poch chuan sawi zawmin, "Tun ang dinhmuna Spurs an ding ta mai hi pawi ka ti a, club chhungkua leh fan ten an tuar natzia ka hmu a, pai dam theih a ni lo a ni," a ti a, fan-te a khawngaih thu a sawi.

Pochettino hian kum 2014 - 2019 khan Spurs hi a lo enkawl tawh a, Premier League club hmuhnawm ber pawlah a chhuah thei - Champions League final hial a hruai thleng a, mahse, UCL final an khelh zawh season-ah chuan a hna aṭangin chawlhtir a ni.

Spurs a chhuahsan hnua Paris St-Germain leh Chelsea te pawh enkawl tawh Poch chuan, "England hi ka ngaina em em a, ka lo kir leh lo ang tih ka sawi thei lo. Ka mimal nun, ka coaching kalphung zawng zawngte hi Premier League nen a inhne rem thlap a ni," a ti.

Spurs hian May 3, Pathianni zan dar 11:30-ah Aston Villa lenchilhin, league match an khel dawn a, Leeds United, Chelsea leh Everton hmachhawn tur an la nei bawk.

London Hmar Veng club hi tun dinhmunah table-ah 18-na an ni a, a him china awm West Ham chu match li chiah khelh tur awm tawhah point hnihin an thlau mek a ni.