Real-in Jose Mourinho an duh

Nomawi chawi loa season khar tur Real Madrid chuan season thar atan coach thar tur an thlithlai mek a, Real Madrid president Florentino Perez chuan an coach hlui Jose Mourinho lak kir leh ngei a duh.

Real hian Xabi Alonso hoin season bul an ṭan a, mahse, an midfielder hlui hi January khan banin, an club player hlui tho Alvaro Arbeloa an la lut. Mahse, Spanish coach hnuaiah an beisei ang result an nei lo a, nomawi an chawi dawn lo.

Hei vang hian Real chuan season thar aṭanga an coach thar tur an dap ṭan a, Perez chuan Mourinho hruai kir mai hi a duh niin an sawi. Portuguese coach ṭawng duh ve tak hian 2010 - 2013 inkar kha Real hi enkawlin, La Liga, Copa del Rey leh Spanish Super Cup-ah te a champion pui.

Mourinho hian Real hi 2011-12 season-ah khan point 100 hmuhpuiin, La Liga season khata point hlawh chhuak hnem ber record an siam hial. Mahse, Real-a thuneitu ṭhenkhat chuan an coach hlui lak let hi an duh lo nia sawi a ni ve bawk.

Chelsea boss hlui Mourinho hian Benfica enkawl mekin, league-ah pahnihna a nihpui mek. Mi tam tak chuan Portuguese manager hian a vanglai a pel ve tawhah an ngai a, hetihrual hian Portugal national team nen pawh sawi zawm reng a ni tho.

Mourinho hian kum 2027 thleng Benfica-ah contract nei mah se, a contract-ah hian a chhuah theihna dan erawh ziah tel a ni thung. Madrid hian Mourinho bakah USA coach Mauricio Pochettino leh France coach Didier Deschamps pawh an ngaihven niin an sawi.

Liverpool coach hlui Jurgen Klopp hming pawh a ri leh ṭhin a, mahse, German coach hian Red Bull-a global head of soccer hna a chelh mekah a lungawi tawk thu a sawi fo - Real enkawl tur a la chiang rih lo hle.

Real hian Pathianni zan dar 12:30-ah Espanyol an lenchilh dawn a, champion nomawi an beiseina tlem te an la neih chhi nung turin Real hi an chakn a ngai.