MRB leh Pro Volleyball League thawkdun dawn

Mizoram Rural Bank chuan a vawi khat nan Pro Volleyball League title sponsor a ni dawn. Mizoram chhunga volleyball inelna sang ber Pro Volleyball hi May 11, Thawhṭanni hian LPS Arena, Falkland-ah khelh ṭan a ni dawn. Mizoram Rural Bank Pro Volleyball League-ah hian mipa team sarih leh hmeichhe team pali an awm ang.

MRB hi September 27, 1983 khan din a ni a, MINECO, Aizawlah office pui ber neiin chairman Sheryl L Vanchhong hnuaiah branch 106 hawng tawhin Aizawl leh Lungleiah regional office pakhat ve ve an nei bawk. Pro Volleyball hi MRB bakah D3 Business Enterprise, Orient Goldsamith leh EverHome House of Furniture chuan nikum ang bawkin championship an sponsor leh dawn.

Inkhel apiangah Kuriz Player of the Match lawmman sem a ni dawn a, kum dang ang bawkin mi mal chawimawina, championship chhunga player ṭha leh coach ṭhate hnenah lawmman pek a ni bawk ang. Vawiin chhun dar 12:00 hian Hawla Indoor Stadium Conference Room, Republic Vengthlangah fixture leh handbook tlangzarh a ni dawn.