Chawnpuiin Armed Veng an pet tla

MBOCWWB ADFA Inter Village Football Tournament 2026-ah Chawnpuiin football thiam veng Armed Veng beiseina an tawp. Nimin khan RG Stadium-ah Chawnpui leh Armed Veng hun pangngaiah 1-1 in an inhnehtawk a, penalty shootout-ah Chawnpui 5-4 in an vannei ta zawk.

Mualpui boruak nuam tak hnuaiah Chawnpui leh Armed Veng ten football hmuhnawm an pho chhuak. NECS Cup champion tawh Armed Vengin inkhelh ṭantir lamah Chawnpui tlarhnung rum ṭhaih mah se Chawnpuiin hun ṭha an bawhpelh lo a, India aiawha futsal khel pha David Laltlansanga'n minute 19-naah goal mawi bik a khung. Avida hian box chhunga mawi zetin ball a la thla a, Mizoram Police defender ṭha Lalhmunmawia'n (Ahmuntea) a tibuai chungin goal-ah a chantir tho.

Armed Vengin goal an chhuah hnuah an nawr na zawk a, open play-ah goal khung thei lo mah se minute 59-naah ke vei lama ball pet thiam K. Lalrindika'n box pawn chiah aṭangin freekick aṭangin a khung. Goal chance hmuh tur a awm chhunzawm a, goal hmuh tur erawh a awm tawh lo.

Penalty shootout-ah pressure a sang tih a hriat a, Armed Vengin chak theihna hun ṭha ṭum hnih an pawhpelh. Tawnhriat nei ṭha Lalfakzuala leh Lalduhkima ten an khung lo. Duhkima pet hi keeper-in a dan hnuah goal lamah a sawt phei a, goal ban a per a, Armed Veng an chak teuh hle.

Sudden Death-ah vawi hnih dang an pet leh a, a pet hnuhnung zawk Armed Veng an vanduai. Substitute John Lalnunmawia pet chu Chawnpui keeper Saktea'n a dansak a, Saktea'n penalty shootout-ah Chawnpui 5-4 in an chakpui