Villa lakah Wood hoin Forest an dingchang

Europa League semifinal first leg-ah Nottingham Forest chuan 1-0 in Aston Villa an hneh. English club pahnih inkhela goal awmchhun hi Chris Wood-a'n penalty aṭanga a khung a ni a, Forest chak nan a tawk.

Semifinal dangah Portuguese club Braga chuan German club Freiburg 2-1 in an hneh ve bawk. Europa League semifinal second leg hi May 7, Ningani zanah khelh a ni ang.

Chhandamtu Ortega

City Ground-a inkhelah mikhual Villa an hlauhawm hmasa zawk a, Youri Tielemans-a long shot ṭha zet leh, Ola Aina tihsual avanga Emiliano Buendia chance neih chu, Forest keeper Stefan Ortega-a'n a dansak a, Forest an him hlauh.

Manchester City keeper hlui hian Morgan Rogers-a shot ṭha zet chu a dang bawk a, first half-ah Forest player langsar ber a ni. Forest tan Igor Jesus-a'n hnai tak aṭangin a khung thei lo a, Emiliano Martinez-a'n a man hmanin first half-ah goal a lut lo.

Second half-ah pawh Villa bawk an hlauhawm a, Rogers-a ball vawrh luh chu Ollie Watkins-a'n yard ruk vel aṭangin pet nghal mah se, Ortega bawk a inlar a, German keeper hian a dang ṭha takzet.

Forest vanneih hun a inher chhuak a, minute 67-naah Omari Hutchinson-a'n ball out tur a petchhuahna lamah, Villa defender Lucas Digne kutah a pet per a, referee-in minute li zet VAR replay a ennawn hnuah penalty a pe.

Penalty pet turin Wood a rawn pen chhuak a, goal kilah tak kawh taka pet lutin an goal awmchhun a khung a, penalty 'specialist' Martinez-a'n a dang thei lo.

New Zealand forward Wood hian a career-a goal 200-na chiah a ni a, thla ruk zet a khup hliam vangin chawl mah se goal khung dan a la theihnghilh lo.

Goal an chhuah hnuah Villa-in nawr mah se, chance hlauhawm an siam hleithei lo a, Watkins leh Jadon Sancho te chance neih chu Ortega tan inrintawkna belhtu mai chauh a ni a, an mualah si khat faiin Forest an chak.

Harhna thlentu Pereira

Tun season-ah Forest hian manager pali lai an hrawn tawh a, Nuno Espirito Santo, Ange Postecoglou leh Sean Dyche te an rawih hnuah Vitor Pereira an ruai. Portuguese manager hi Wolverhampton-in an ban hlim a nih avangin Forest ṭantute beisei a sang lo hle.

Mahse a match hmasa berah Fenerbahce chu 3-0 in khualmualah hnehna a chanpui nghal a, Premier League lamah Liverpool hmachhawn nghalin, hnehna chanpui zo lo mah se an khelh danin mipui a tilungawi.

Pereira hnuaiah Forest-in hma an sawn zel a, relegation zone an chhuahsan bakah Europa League-ah an che ṭha a, semifinal-ah rinkai zawk ni lo mah se first leg-ah Villa an hneh theih avangin final bakah champion thlengin an sawi ri ngam tawh ang.

Emery a lawm lo

Inkhelh banah Villa coach Unai Emery a lawm lo a, Forest midfielder Anderson-a'n Watkins a tlawh avanga hnawhchhuah a ni lo chu a hrethiam lo hle.

Spanish coach chuan, "Anderson chet dan ka en let a, referee khan a tihtur a ti lo. Anderson khan Watkins-a ke ruh a titliak palh thei a, khatiangah kha chuan red card phawrh ngei tur a ni a, VAR leh match referee ten tihsual lian tak an nei a ni," a ti a, a lungawi lo hle.

Villa hian tun season-ah Europa League-ah chiah nomawi beisei tur an nei tawh a, first leg-ah an chak tawh loh avangin final lut turin, second leg-ah theihtawp an chhuah a ngai tawh dawn a ni.