Inter champion zan a ni dawn em?

Serie A hmahruaitu Inter Milan chuan Pathianni zan dar 12:15-ah Parma an mikhual dawn a, Cristian Chivu-a naute hi an chak a nih chuan anmahni hnaih bertu, Napoli tan lehpelh ngaihna a awm tawh dawn loh avangin, an champion zan a ni thei dawn a, inkhel hmuhawm a beisei ngam.

Tun season-ah Inter an che ṭha a, player inhliam an tam avangin Champions League aṭangin tla tawh mah se, Coppa Italia final an lut tawh a, nomawi pahnih chawi theih an la nei.

A zawna match hnih a khelh theih loh hnuah Inter tan, Lautaro Martinez a khelh theih a rinawm tawh a, Argentine forward hi Serie A goal khung hnem ber a ni mek a, a awm loh hlanin Pio Esposito, Ange-Yoan Bonny leh Marcus Thuram ten a hmunruak an hnawh khat zo lo ṭhin a, a inkhel thei tawh a nih chuan Inter tlarhma an hriam sawt ang.

Inkhel dangah Napoli chuan season thara Champions League khelh tum Como an tlawh dawn a, Cesc Fabregas-a hnuaiah Como an indin thar a, Italian club lian zinga chhiar nan la hma deuh mah se, tun dinhmunah chuan club lian huangah an awm. Hetiang a nih avangin hian Napoli tan point hloh theih a la ni a, UCL khel tura an la tlin chian loh avangin an fimkhur a ngai dawn.