UCL khelh tum Hoffenheim leh Stuttgart intawng dawn

Bundesliga champion a chiang tawh a, relegate tur leh season thara Champions League khel tur a la chiang ve lo. Zanin dar 7-ah palina Stuttgart chuan an hnuai chiha awm Hoffenheim an lenchilh dawn a, inkhel hmuhnawm an lantir a rinawm.

February thla thleng khan Hoffenheim hi palinaah an awm a, mahse chetsual an chin avangin RB Leipzig leh Stuttgart te an chungah an awm tawh. Hoffenheim tan Croatian forward Andrej Kramaric chu an innghahna a ni leh dawn a, goal 12 khung tawhtu forward hian goal khung ngei a tum dawn.

Hetihlai hian Stuttgart-in season an hmang ṭha a, DFB-Pokal final an lut tawh a, League lamah pawh an che chhe hran lo. Stuttgart che ṭhat nan Deniz Undav a ṭangkai a, German forward hian tun season Bundesliga-ah goal 18 khung tawhin, Harry Kane chiah a tluk lo. Undav hi Hoffenheim lakah pawh Stuttgart hmachhuan ber tur a ni.

Bundesliga-ah match thum chiah khelh tur a awm tawh a, zanina chak zawk zawk hi Champions League khel turin an dinhmun a ṭha tawh dawn a, team pahnihten chak lo zawk nih an duh dawn lo.

Hetihlai hian champion Bayern chuan table mawng luahtu, Heidenheim an mikhual dawn a, Bayern hi karleha Paris St-Germain nen UCL-ah an inkhelh leh dawn avangin, Heidenheim lakah player ṭhenkhat an hahdamtir a rinawm.