Hakimi thlaktu tur Zaire-Emery

French club lian Paris St-Germain defender Achraf Hakimi hliam chu MRI test neih a nih hnuah, thla thum tal a chawlh a ngai dawn a, kar leh Champions League-a Bayern Munich nen second leg an khelh hunah a inlan ve thei dawn lo tih a chian hnuah, Luis Enrique chuan Warren Zaire-Emery chu Hakimi hmunruak hnawh khah nan a hmang dawn.

Morocco international Hakimi hi Bayern nen first leg-a an intawn khan, hun tawp dawnah Konrad Laimer nen an inchuhna lamah a malpui ding lam a tina a, endik a nih hnuah rin aia a nat avangin a chawlh rih a ngai dawn. Tun season-a game an khelh hmabakah Hakimi hi a inlan a rinawm tawh loh.

PSG hi tun hnaiah an vanduai a, Hakimi hma hian keeper Lucas Chevalier chu a malpui na vangin an lo chân tawh. Nikum December leh kumin January-a AFCON khelh a nih lai khan, Zaire-Emery hian Hakimi aiawhin right back-ah a lo khel tawh a, Hakimi nena khaikhin chi ni lo mah se a khel chhe hran lo. Hei vang hian Enrique-a'n hman nawn leh a tum niin a lang.

Zanin dar 8:30 hian PSG hian Lorient an mikhual dawn a, Ligue 1 match li khelh tur la awmah PSG hi point rukin pahnihna RC Lens aiin an sang zawk a, champion tur erawh a la chiang lo. PSG hi UCL leh league title chawi nawn tum an ni a, match pawimawh an neih kara player inhliam an neih belh avangin an coach, Luis Enrique-a lu a hai phah ang.