NorthEast United chak ve leh ta

Indian Super League pawh khelh chhunzawm zel a ni a, match nga zet a zawna an chak zawh tawh loh hnuah NorthEast United pawh an chak ve leh ta - Inrinni zan khan an mikhual Inter Kashi chu 3-2 in an hneh.

Highlander hian Jithin MS hmangin first half hun pek belhah goal hmahruai an khung a, minute 63-naah Inter Kashi center back Wayne Vaz chuan Jairo Samperio titluin, penalty a chawi - hnawhchhuah a ni bawk.

NorthEast tan Andy Rodríguez chuan penalty hi khungin, 2-0 in hma an hruai hman. Mahse, I League champion Inter hianm player kim loa khel chungin, Sergio Llamas leh Mohammed Asif hmangin si phurh an sut a, 2-2 a ni.

Mahse, minute 90-naah Highlander tan Parthib Gogoi chuan khung lehin, Inter Kashi tan chhanletna hun a awm tawh lo - Highlander tan hian Lalrinzuala chu bench aṭangin a lut.

Inrinni zan ISL inkhel hnuhnung zawkah Sporting Club Delhi leh Punjab FC te chu 0-0 in an inhnehtawk - Delhi tan Augustine Lalrochana chu a inkhel tluan a, he inkhela Mizo inlan awmchhun a ni.

Hetihlai hian Zirtawpni zan khan Jamshedpur FC chuan 2-0 in FC Goa an hneh a, ISL table chung ber an luah - Mohammed Sanan leh Madih Talal ten goal khat ve ve an khung a, Goan club-in a chhanletna tur an nei lo.

Men of Steel tan Lalhriatpuia Chawngthu chuan inkhel bul ṭanin, Goa tan Ayush Chhetri chuan bul a ṭan - bench aṭangin striker Daniel Lalhlimpuia lut mah se, a team chhan nan hun a tam tawk tawh lo.

Jamshedpur-in hnehna an chan avangin ISL table chung ber an luah a, point khatin hmahruaitu Mohun Bagan an tlansan - match hnihin an khel tam thung.