Taekwondo belt exam nei

Mizoram Amateur Taekwondo Association chuan May 1, Zirtawpni khan 1st Session Colour Belt Exam an buatsaih a, club pakua aṭangin taekwondo zirlai 281-in ṭha takin exam hi an paltlang.

Electric Veng YMA Hall, Aizawla neih exam-ah hian physical fitness, basic technique, hand & leg technique, poomsae, self Defence, sparring, breaking leh speed endurance te an exam.

Exam-ah hian Chief Examiner Lalinpuia 3rd Dan black belt hovin World Taekwondo Federation black belt panga, Vanlalmawipuia, Vanlalchhanhimi, Jonathan F.Lalhmingmawia, Felix Lalnunpuia leh Lalramhluna ten an endik.

Armed Veng South Taekwondo Club aṭanga Red One exam hmachhawntu Andrew Zothantluanga chu exam zinga tiṭha ber niin, chief technical director Master VL Sawma'n lawmpuina a hlan nghal.

Remruatfeli Hnamte, Armed Veng Taekwondo Academy zirlai chu exam zinga naupang ber niin, kum nga leh thla li mi a ni a, yellow belt exam a hmachhawn a ni.

Kum 2026 atana taekwondo colour belt exam session hmasa ber hi MATA general secretary Master Joseph Thansanga, Master VL Sawma leh T. Lalnunsiama ten an hmanpui bawk a, exam hi Mizoram district hrang hrangah kalpui chhunzawm tur niin, May thla chhunga zawh a ni ang.