Pro Volleyball mipa leh hmeichhe fixtures a chhuak

Mizoram Rural Bank Pro Volleyball League fixtures chu Inrinni khan Hawla Indoor Stadium Conference Hall, Republic Vengthlangah tlangzarh a ni a, a hawn zanah nikum final-a inhmachhawn Anastasia Electric Veng leh Thutak Nunpuitu Team te an inkhel nghal dawn.

Mizoram Volleyball president Dr Lalmalsawma Nghaka chuan, "Pawlin sum nghah lo mah se hruaitute inlungrualna leh LPS Vision nen ṭha taka thawh hona kan neih avagnin a vawi kua nana Pro Volleyball kan buatsaih tur hi a lawmawm hle. Mizoram volleyball zahawmna humhimpui tur leh tinung zel turin club tinte ka sawm a ni," tiin a sawi.

Inelna hi May 11, Thawhṭanni zanah LPS Arena, Falkland-ah khelh ṭan a ni dawn. Pro Volleyball fixtures hi filmstar Lalruatsangi'n (Sangsangi) a tlangzarh a, musician Victor Vanlalhruaia'n handbook a tlangzarh bawk.

Mipa inelna hi team sarih Anastasia Electric Veng, Thutak Nunpuitu Team, Tuichangral, Khawbel, Sihphir, Hunthar leh Chhinga Veng Spikers ten an hmachhawn dawn. League round hi May 11, Thawhṭanniah khelh ṭan a ni ang a, June 6, Inrinniah khelh zawh a ni dawn.

Semifinal hi June 10-11, 2026-ah khelh tur a ni a, June 13, Inrinni zanah a hmawr bawkna neih a ni ang. Hmeichhe lamah team li Tuichangral, Chhinga Veng Spikers, Eric Pautu Academy leh ITI Veng GSA te an tel a, vawi khat ṭheuh an inkhelh chhuah hnuah a sang pahnihin final an khel ang. Hmeichhe inelna final hi June 12, Zirtawpni zana khelh tur a ni.