Napoli-in Inter champion kawng hawnsak

Inrinni zan Serie A inkhelah Napoli chuan goal awm loin, Cesc Fabregas-a enkawl Como an inhnehtawkpui a, Napoli hi an chak zawh loh avangin hmahruaitu Inter Milan tan champion-na chance duhawm an siamsak.

Stadio Giuseppe Sinigaglia, Como-a inkhelah mualneitu an hlauhawm nghal a, minute sarihna lekah Anastasios Douvikas-a'n chance nei nghalin, keeper a bum tlang hnuah a pet goal thei lo. Como tan Assane Diao, Martin Baturina ten an chance neih chu goal-ah an chantir thei lo ve ve.

Napoli tan Scott McTominay-a'n a chance neih chu, ṭum hnih lai goal zawnah a pet thei lo a, hun tawp dawnah Matteo Politano-a'n goal ban a pet per chu Napoli chance neih ṭhat ber a ni a, goal an khung theih loh avangin point khatah an lungawi a ṭul.

Antonio Conte naute hian point thum an hlawhchhuah theih loh avangin, point 70 hmuin pahnihnaah an awm chhunzawm a, nizan inkhelah Inter-in Parma lakah point an hlawhchhuak hrim hrim a nih chuan an champion tawh dawn a, chuvangin Napoli result-ah Inter an lawm khawp ang.

Napoli hian Inter tan kawng an hawng a ni mai lo a, AC Milan-in Sassuolo an hneh a nih chuan pathumnaah an tla leh thei a, Champions League khel turin an match hmabakah an chetsual a thiang tawh dawn lo.