Barca-in champion an hnaih

Spanish club lian Barcelona chuan Inrinni zan khan, an mikhualna ramah 2-1 in Osasuna an hneh a, match li khelh tur an la neihah an chesual viau a nih loh chuan an champion a rinawm tawh.

Catalan club tan Robert Lewandowski leh Ferran Torres ten goal khat ve ve an khung a, Osasuna tan Raul Garcia-a'n goal khat khung ve mah se scoreline timawitu chauh a ni.

A goal har

El Sadar, Pamplona-a inkhelah dan pangngaiin mikhual team Barca an hlauhawm hmasa zawk a, minute kuana lekah Lewandowski-a'n chance nei nghalin, goal zawnah erawh a pet thei lo.

Barca tan Eric Garcia-a'n a chance duhawm neih a hlah a, Roony Bardghji-a'n chance neih chhunzawm mah se, goal hmaah an hriam tawk loh avangin an chance neih an chhawr ṭangkai thei lo.

Mualneitu team an bet reng bik lo a, Ante Budimir-a'n thui tak a khalh hnuah goal ban a pet per a, Osasuna striker chhuanvawr hian chance neih chhunzawm mah se Barca keeper Joan Garcia a paltlang thei lo.

Tun season La Liga-ah Budimir hian goal 21 a khung tawh a, Kylian Mbappe chauh tluk loh nei mah se Barca lakah goal a khung theih bik loh avangin, goal lut loin chawlhlawk an hmang.

Second half-ah Barca an hlauhawm leh nghal a, Dani Olmo-a'n hnai taka a chance neih chu Alejandro Catena-a'n a dansak hman hlauh. Hansi Flick-a'n goal khung duhin Gavi, Ronny leh Olmo te aiah Frenkie De Jong, Marcus Rashford leh Torres te a luhtir a, Barca goal bawh a na sawt.

Minute 81-naah Barca-in goal an khung ta nge nge a, Rashford-a ball vawrh luh chu Lewandowski-a'n defender venna aṭanga tal putin a tauh lut a, Barca hma a hruaipui. Polish forward goal khung danah a class san zia a tilang a, striker goal dik tak a ni.

Barca-in an la duhtawk mai lo a, minute nga hnu lawkah goal an khung leh nghal. Fermin Lopez-a ball pek ṭha tak chu Torres-a'n um lutin, rilru fim takin keeper kap karah a pet lut a, an hmahruaina a belhchhah.

Osasuna tan minute hnu lawkah, Abel Bretones-a cross chu Garcia-a'n ṭha zeta tauh lutin an siphurh a sut ṭhen. Minute riat zet hun pek belh ni mah se Osasuna-in goal dang an khung thei tawh lo a, Barca-in hnehna an chang.

Hello Champion

Barca-in hnehna an chan leh tak avangin an hmelma, Real Madrid aiin point 14-in an sang tawh zawk. Real hian nizan khan Espanyol an hmachhawn a, an result kan hre hman lo.

Los Blancos-in point thum hlawhchhuak zo lo a nih chuan, an tan Barca lehpelh ngaihna a awm tawh dawn lo a, Barca kutah La Liga nomawi an hlan tihna an ni ang. An chak a nih chuan Barca tan nghah hret a la ngai dawn thung.

Catalan club tan thu lawmawm dang a awm a, kar nga chhung zet hliam vanga a chawlh hnuah Raphinha chu bench-ah a ṭhu leh tawh. Barca-in tun season atan Lamine Yamal an chân tawh a, hetiang boruak kara Brazilian forward dam leh hi coach Flick-a tan thawk huaina tham a ni.