Vanneihnain PSG a zui

Paris St-Germain chuan Inrinni zan khan 2-2 in Lorient nen an inhnehtawk a, table-a pahnihna RC Lens tan anmahni hnaihna hun ṭha siamsak mah se, Lens hi Nice lakah an chak zo bik lo a, 1-1 a inhnehtawkin an inthlauhna danglam lo.

Parc des Princes-a inkhelah mualneitu tan coach Luis Enrique-a'n Champions League-ah, Bayern Munich an la tlawh dawn tih hriain Marquinhos, Vitinha, Ousmane Dembele leh Khvicha Kvaratskhelia te a luhtir lo a, anni tel loin PSG an khel ṭha tawk lo.

Minute rukna lekah Ibrahim Mbaye-a'n tauh lutin PSG hmahruaina goal a khung a, mahse mikhual team Lorient an zam bik lo. Minute ruk hnu lawkah Pablo Pagis hmangin an sut ve leh nghal.

Second half-ah PSG an chungnung zawk a, minute 62-naah Warren Zaire-Emery hmangin hma an hruai nawn leh a, harsa lutuk loin an chak mai a rinawm hman. Mahse Lorient tan Tosin Aiyegun-a'n PSG defender Pacho a bum hnuah an siphurh a sut nawn. Hun tawp thlengin goal dang a lut tawh lo a, team pahnihten point an insem.

PSG hian May 6, Nilaini zana Bayern an hmachhawn hnuah Brest an mikhual leh nghal dawn a, hemi hnu hian Lens nen an la inhmachhawn leh dawn avangin vawi khat chetsual a pawi thei dawn. Ligue 1 nomawi inchuh boruak a la sang dawn chauh.