Big Six-te ngamtu Carrick

Michael Carrick-a'n Manchester United coach a nih hnuah league match 14 kaihruaiin, vawi 10 hnehna a chanpui a, Premier League 'Big Six' tia sawi ṭhin Manchester City, Arsenal, Tottenham Hotspur, Chelsea leh Liverpool te a hneh vek.

Carrick-a'n United a enkawl hnuah Red Devils aia point hmu tam zawk an awm lo a, English coach hian hna a thawk ṭha thlawt - season tawp thleng atana lakluh coach hi United fans tam zawkin coach nghet ni zui turin an duh a, inkhelh zawhah a hming lamin an zai nasa hle.

Mahni infak khat ve tak, 'cool' dap reng Carrick meuh pawhin United coach nih chu a inhmeh thu a sawi chhuak ve tlat! English coach chuan, "Chona hautak em em kan hmachhawn a, mahse, kan kaltluang ta hle a, team ṭha tak tak kan hneh bawk.

"Ka hnathawh hi nuam ka ti a, a nihna ang takin sawi dawn ila, United coach ka nih hian, ka nihna tur ang renga duan ang mai niin ka hria. Hna harsa tak a ni a, mahse, he hmunah hian rei tak awm tawh ang mai ka ni - United coach nih hi a nuam hle," a ti.

United hian match thum khelh tur la nei chungin Champions League-a an hmun an tichiang a, kum hnih hnua a vawi khat nan European football inelna sang berah an inlan leh dawn.

Carrick chuan, "United ka zawm khan, Champions League chu kan tan a sang hle. Mahse, Europe-a kir ngei kan duh a, match thum khelh tur la awm chunga kan chingfel thei hi kan tan chuan hnathawh ropui tak a ni," a ti a, a hnathawhah a lawm.