Liverpool tan chhuanlam?

Premier League champion Liverpool-in Manchester United an ngam lo a, season hmasa lawk kha chuan Reds hian table chung ber luahin, point 42-in United aiin an hmu hnem - tunah erawh United hnuaiah an awm mek.

Liverpool-in United an ngam loh chiah khan tun season-a inelna hrang hranga match 18 an tlawmna chiah a ni a, 2009-10 season khan vawi 19 an tlawm - khami hnua season khata an tlawm hnem ber a ni.

Kha season kha Champions League-a ropui taka Liverpool champion puitu Rafael Benitez-a'n Anfield-a a season tawp ber a hmanna a ni zui a, Arne Slot hi an ban ve mai ang em? tih chu zawhna awm a ni.

Hetihrual hian Slot hian chhuanlam tur a nei. First choice keeper Alisson leh second choice keeper Giorgi Mamardashvili an chhawr thei lo a, third choice Freddie Woodman-a'n goal a ven a ngai.

Liverpool hian tun season-a an striker form ber Hugo Ekitike chu hliam vangin tun season chu an chhawr thei tawh dawn lo a, United ngam em emtu Mohamed Salah chu hliam vangin squad-ah a la awm lo bawk.

Pound maktaduai 125 man Alexander Isak-a'n hliam reng rengin hun a hmang a, Old Trafford-ah pawh hliam tenau vangin United a hmachhawn thei lo.

Liverpool boss Slot chuan, "United chakna kha kan thunun thei lo a, set piece leh counter attack-a an hlauhawmzia pawh kan hria. Manchester United kan hmachhawn a nih chuan fimkhur a ngai a, player tlan chak tak tak an ngah hle.

"Kha tah tak khan harsatna thlen turin Bruno Fernandes a awm a, chu chiah chu kan goal hnihna kan chhuah dan pawh a ni," a ti a, chhuanlam a zawng lo.