Valpuia'n an Pangzawl tan hna a thawk

Mumbai City fullback Hmingthanmawia Ralte (Valpuia) chuan tun hnai khan a chawrchhuahna khua, Pangzawl Venghlun tan Volleyball Court a siamsak a, Valpuia chuan, "Kan chawr chhuahna a ni a, an tana ka tih ve theih tawk a ni," a ti.

Valpuia chuan, "Ka pu thihna avangin hmanni khan kan haw a, volleyball court an lo nei ṭha tawk tawh lo tih ka hmuh khan ka rilruah a awm reng a, phak tawk tam lo mah se, theihtawp chhuahin a thawm ṭhat hna kan thawk ve a ni," tiin Vanglaini a hrilh.

India tan pawha vawi ruk inlan tawh Valpuia hi Mumbai player pawimawh a ni a, tun season-ah ISL match 10 khel tawhin, Mumbai club hi champion thei dinhmunah a dinpui mek.

Mumbai hian match thum khelh tur la nei chungin, table-ah palina an ni mek a, hmahruaitu Jamshedpur FC chu point hnihin an phak lo - match khatin an khel tlem thung.

Tun season ISL-ah match 13 chauh khelh tur a nih avangin champion tur sawi thiam a harsa a, vawi khat chetsual a pawi dawn - Mumbai hian zanin dar 7:30-ah East Bengal an mikhual dawn a, Kolkata club hi anmahni ang thoa champion beisei an ni.

Valpuia chuan, "Ka mimal khelh danah chuan ka lawm tawk a, hetihrual hian champion leh champion loh erawh sawi a la harsa. Match khelh tur a tam lo bawk nen, team dang result-ah kan innghat tel tawh tlat a ni," tiin Vanglaini a hrilh a, champion beisei mah se, a harsa dawn tih a hai lo.