Sesko a handball em?

Manchester United leh Liverpool inkhelah United goal hnihna chu Benjamin Sesko-a'n a khung a, mahse, Slovenian striker hian goal luh hmain, a kutin ball a tawk fuh niin a lang a, Liverpool boss Arne Slot chuan goal kha pawm loh tur niah a ngai.

Slot chuan, "Tun season-a VAR inrawlhna reng rengah, kan tana ṭha lo tur zelin a thleng a ni," a ti a, Paris St-Germain nen an inkhelh ṭuma VAR-in a duhsak lohna thlengin a sawi chhuak.

Dutch coach chuan, "Mahse, âtthlak takin, a hun leh hmun loah ball kan hloh ṭhin a, a pawimawh ber chu keimahni kan in en hmasak a ni. Tun season-ah VAR-in min la duhsak lo tih hi thil chiang a ni a, ho lam takin goal kan chhuah ṭhin tih pawh thil chiang a ni," a ti.

England legend Alan Shearer chuan, "Handball ni ngeiin ka hria a, khatiang vanga goal pawm loh kha chu ṭha ka ti lem lo. Chutihrual chuan dan anga kan kal dawn a nih chuan pawm loh tur a ni," a ti a, handball ngeiah a ngai.

Sesko goal khung danah sawisel theih tak a awm rualin, he goal luh theih nana United che vel chuan mit a titlai hle. Bryan Mbeumo-a'n ṭha zeta Bruno Fernandes ball a pek hnuah, United captain hian Sesko tan a pe.

Slovenian striker-in ball a tawh fuh hmain Liverpool keeper Freddie Woodman a inrawlh hman a, Sesko a tlu bawk. Mahse, heta ṭanga ball kal hi United-in an chan chhunzawm - Bruno-a'n ṭha zetin Sesko tan a tauh a, Woodman-a'n lo khawih per hman mah se, Sesko a per a, goal-ah a lut.

Virgil van Dijk-a'n a tih tur a ti tawk lo a, hetihrual hian ball hian Sesko kut a fuh ngei niin a lang. VAR-in minute thum zet a en dik a, a tawpah chuan goal atan an pawm.

Premier League Match Centre chuan thuchhuah siamin, "Referee goal pawm chu VAR hmanga ennawn a ni a, Sesko-a'n ball a tawk fuh ngei tih chianna engmah a awm loh avangin goal atan pawm a ni," an ti.

VAR hian camera kil tin aṭangin ball-in Sesko kut a per leh per loh hi an en a, angle ṭhenkhatah fuh angin lang mah se, a ṭhenah a fuh lo angin a lang thung a, hei vang hian goal-ah pawm a ni ta a ni.