Serie A-ah Inter Milan an champion

Italian club lian Inter Milan chuan Pathianni zan khan 2-0 in Parma an hneh a, match thum khelh tur la awmah anmahni hnaih bertu, Napoli chuan an lehpel thei tawh lo a, a vawi 21 nan Serie A-ah an champion.

Inter tan French forward Marcus Thuram leh Armenian midfielder Henrikh Mkhitaryan ten goal khat ve ve an khung a, Parma-in a chhanletna tur an nei ve lo.

Inter an vul

San Siro-a inkhelah mualneitu an hlauhawm nghal a, Nicolo Barella ball vawrh luh chu Denzel Dumfries-a'n a tauh lut nghal teuh hle. Inter an hmuhnawm chhunzawm a, mawi taka ball an inpek kual hnuah Barella-a'n goal ban a pet per dawp a, a per chu Thuram-a'n umzui mah se Parma keeper Zion Suzuki-a'n a beng chhuak hman hlauh.

First half hun pek belhah Inter-in goal an khung ta nge nge a, Polish midfielder Piotr Zielinski pass ṭha tak chu Thuram-a'n chiang takin a pet goal a, goal khata hmahruai chungin chawlhlawk an hmang. Thuram hian tun season Serie A-ah goal 12 a khuing tling chiah a, a teammate Lautaro Martinez chiah a tluk lo.

Second half-ah pawh Inter bawk an hlauhawm chhunzawm a, an vanneih zan ni se goal tam zawk khung thei tur an ni. Federico DiMarco cross Dumfries-a'n a pet goal loh te chu a uiawm takzet.

Minute 80-naah Argentine forward Martinez-a cross chu, vengtu nei lo Mkhitaryan-a'n awlsam takin an chak nemngheh nan a khung. Davide Frattesi-a'n chance nei chhunzawm mah se Suzuki an paltlang zo tawh lo a, 2-0 in Inter an chak.

Chivu a lawm

Inter hi champion an nih bakah an coach Cristian Chivu-a'n coach a nih hnua trophy a chawi vawi khatna a nih avangin a hlu bik hle. Romanian coach chuan, "Player ka nih lai khan thil tam tak chu ka lo ti ve tawh, mahse tuna kan hlawhtlinna avang ka inkhelh ve ṭhin lai tluk zetin ka hlim. He club leh a ṭantu ropui tak, a tir aṭanga min thlawptu zawng zawngte vang hian ka lawm bawk.

Nikum lama thil thleng leh kan chanchin an sawi dan te, min sawichhiat dan zawng zawngte kha sawi nawn leh ka tum tawh lo. Mahse kan player te hian hun harsaah pawh an rilru a fim a, season thar atana inbuatsaih dan an thiam em em a, champion nih an phu takzet," a ti.

An hmabak

Milan club hian Coppa Italia final khelh an la hmabak a, May 13, Nilaini zanah Lazio nen champion an inchuh dawn. Serie A-ah an champion tawh avangin Chivu-a'n a naute hahdamna hun a pek a rinawm tawh a, Coppa Italia final atan an insawrbing thei tawh ang.

Inter hi season laihawlah hliamin a tlakbuak a, Champions League last 16 playoff-ah Bodo/Glimt hneh loin an tla. Nomawi chawi tur an la neih chhun hi an thlauh phal tawh dawn lo a, thi leh thau pawlha an khelh a rinawm a, rinkai zawk pawh an ni.