Miami GP-ah Antonelli bawk

May 3, Pathianni zan khan Miami Grand Prix tlan a ni a, Mercedes driver Andrea Kimi Antonelli bawk chakin, a zawna a vawi thum chakna chiah a ni a, table-ah a hmahruaina a tihzau belh.

Antonelli hi pole winner leh Championship-a hmahruai thei naupang ber a ni a, a zawna intlansiak vawi thum chak thei naupang ber a ni leh ta chiah a, hetiang ti thei hi Michael Schumacher leh Ayrton Senna te chiah an la awm.

Italian driver Antonelli hian bul a ṭan ṭha a, Charles Leclerc nen a tir lamah inel mah se, Leclerc hian lap tawp lamah bang a tai, vawi tam track a chhuahsan avangin second 20 paihsak a ni a, pariatnaah a thleng thei hramin Antonelli erawh a dingchang.

Pahnihnaah McLaren driver Lando Norris awmin, a teammate Oscar Piastri chu pathumna a ni bawk. Palinaah Antonelli teammate George Russel a thleng a, tun hnaia chanchin ngah tak Max Verstappen chu pangana niin, paruknaah Lewis Hamilton-a'n a zui.

West Asia indona vangin Bahrain leh Saudi Arabia GP te ṭhulh a ni a, thla khat zet hnuah inelna ṭan leh a nih avangin Miami GP-in mipui ngaihven a hlawh. Mahse inelna ṭan hmaa ruah a sur hnem avangin ṭhulh leh a ni hman ṭep.

Inelna neih a nih hnuah track hmun ṭhenkhat laiah, tui tling hmuh tur a zawm zeuh zeuh a, hei hian track a tihnal phah deuhin a lang a, mahse driver leh team principal te zingah sawiseltu an la awm lo thung.