NBA conference semifinals lut a hriat kim

Nimin zing NBA playoff khelhah Detroit Pistons leh Cleveland Cavaliers te chuan, an khingpuite an hneh ve vein semifinals an lut. Pistons hian 116-94 in Orlando Magic an hneh a, seven game series-ah 4-3 in an chak. Cavaliers pawhin Raptors lakah 114-102 in hnehna an chang a, 4-3 bawka chakin round 2 an kai.

Eastern Conference

Pistons leh Cavs hi an inhmachhawn nghal dawn a, naktuk zing dar 4:30-ah an inhmachhawn nghal dawn. Pistons hi regular season-ah Eastern Conference hmahruaitu an nih avangin rinkai zawk an ni ang.

Eastern Conference match dangah New York Knicks leh Philadelphia 76ers te an inhmachhawn dawn bawk a, regular season-ah Knicks hi sang zawk mah se playoff-ah 76ers hian Boston Celtics an hneh a, 3-1 a hma an hruaina chu an lehthal leh theih avangin an boruak ṭhat lai a ni.

Western Conference

Regular season-a table hmahruaitu Oklahoma City Thunder chuan Los Angeles Lakers an hmachhawn dawn a, Thunder hi hmahruaitu an nih bakah champion lai an ni a, MVP ni lai Shai Gilgeous-Alexander-a'n a ze ngai a la put avangin champion tura beisei zinga mi an ni.

Hetihlai hian Lakers tan LeBron James-a'n a la tar lo tih a lantir zel a, LeBron thlawp turin Austin Reaves a dam tawh bakah, an player pawimawh Luka Doncic a lo kir hnaih avangin OKC tan zuam chi an ni dawn lo.

Inkhel dangah San Antonio Spurs leh Minnesota Timberwolves an inhmachhawn dawn a, Spurs hi Victor Wembanyama hoa champion inbeisei an ni a, Wemby a dam ṭhat avangin team boruak ṭhat vanglai a ni.

Wolves an duai bik lo a, an thiampuipa Anthony Edwards tel loa Denver Nuggets hneh thei an nih avangin zuam chi an ni dawn lo. Edwards hi inkhelh leh theih hun tur sawi chian theih ni lo mah se, game 3 emaw game 4 an khelh hunah a lo kir beisei a ni.