Lyon-in Champions League hnaih zel

French club hlun Olympique Lyon chuan Pathianni zan khan, anmahni ang bawka Champions League beisei Rennes chu 4-2 in an hneh a, match hnih khelh tur la awmah Lyon hian UCL an hnaih tawh hle.

Mikhual team Rennes tan Mus Al-Taamari-a'n goal khung hmasa mah se, Lyon chhaih kawlhna chauh a ni a, mualneitu team tan Roman Yaremchuk, Corentin Tolisso ten an chhanglet nghal.

Second half ṭantirah Esteban Lepaul-a'n an siphurh sut mah se, Lyon tan Afonso Moreira leh Real Madrid aṭanga an hawh Endrick ten goal khat ve ve khungin, 4-2 in Lyon an chak zawk.

Lyon hian point 60 hmuin pathumnaah an awm a, UCL khelh turin dinhmun ṭha takah awm tawh mah se, pahnihna RC Lens an la hmachhawn leh dawn a, vawi khat chetsual a la pawi theih avangin ngaihṭha taka awm a la theih loh.