Goal thum khung kan tum - Enrique

Paris St-Germain leh Bayern Munich intawn hmasakah goal kua a lut a, 5-4 in PSG an chak. French club enkawltu Luis Enrique chuan goal thum an khung a ṭul thu a sawi!

Barcelona leh PSG tana treble champion ni thei Enrique chuan, "Bayern te ang, a mimal leh team ang pawha ṭha em em hmachhawn hi chuan a harsa ṭhin. First leg-ah khan goal li kan chhuah a, hmasawnna tur kan nei tihna a ni.

"Ka staff-te hnenah chak turin goal engzat nge khung kan mamawh ang, tiin ka zawt a, goal thum kan khung a ngai tihah kan inlungrual a ni," a ti a, attacking football hmuhnawm bik min chhawpsak leh dawn tihna a ni.

PSG hian season hmasa khan Champions League nomawi an chawi a, final-ah Inter Milan chu 5-0 ngawtin an sawp - final khelhna hmun kha Allianz Arena a ni a, zaninah he khelmualah hian an inlan leh dawn.

Enrique chuan, "He khelmual hian hlimna tam tak min lo thlen tawh ṭhin a, kan Champions League nomawi hmasa ber pawh Allianz Arena-ah ngei kan chawi a ni. Bayern hian an fan-te nen min lo hmuak dawn tih ka hria a, mahse, hnehna chang turin kan kal dawn a ni," a ti a, UCL nomawi a chawina hmunah hnehna hlado chham leh ngei a tum.