Goal 10 khung thei Mizoram

Swami Vivekananda U20 Men’s National Football Championship 2026-ah Mizoramin nimin zing khan Madhya Pradesh 10-0 in an sawp. Coach Lalrindika Hmar kaihhruai Mizoram hian Arunachal Pradesh 7-0 in an hneh tawh a, match tawp berah Madhya Pradesh 4-0 a hnehtu Uttar Pradesh nen May 7, Ningani zan dar 7:45-ah an khel ang.

Inelna hi Narainpur, Chhattisgarh-ah khelh a ni a, niminah Mizoramin ground ṭha an chang. Artificial turf-ah Mizoramin an theihna tak an lantir a, Mesak C. Lalrinngheta hmanga bul ṭanin a khat mawi tawkin an khung a ni ber. First half tawp hma chiahin Madhya Pradesh midfielder Ashok Uikey hnawhchhuah a ni a, Mizoram tan hna a awlsam sawt.

Rindika hote tan Freddy Lalruatkima, Lalrinfela Ralte, Vanlalramnghaka leh Henry Malsawmtluanga te goal hnih ṭheuh an khung a, Rothangpuia'n minute 86-naah Mizoram goal 10-na a khung. Mizoram team hi coach H. Lalrindika, manager F. Vanlaltleipuia leh assistant coach C. Lalnunmawia ten an kaihruai a ni.