Coach thlak fuh lo Bengaluru

Bengaluru-in match sarih a kaihhruai chhunga vawi khat chiah tlawmpuitu coach Renedy Singh duhkhawp loa Pep Muñoz an lakluh hnuah chak an la nei lo - Thawhṭanni zan khan Odisha chu 1-1 in an inhnehtawkpui.

Odisha hian Rahim Ali hmangin goal an khung hmasa zawk hial a, mahse, Bengaluru-in minute 48-naah Brian Sanchez (penalty) hmanga si phurh sutin, 1-1 in team pahnih an ṭin.

Bengaluru hian Renedy hnuaiah khan league match sarih khelin, vawi li hnehna a chanpui a, vawi hnih draw neiin, vawi khat an tlawm - Manipur coach an duhkhawp lo a, Pep Munoz an la lut.

Mahse, Spanish coach hnuaiah league match li khel tawhin, chak an la nei lo a, match thum chu an khingpui draw-in, vawi khat an tlawm thung.

Thawhṭanni zan inkhelah hian Odisha tan Vanlalzuidika Chhakchhuak, K. Lalrinfela, K. Lalṭhathanga (Puitea) leh Isak Vanlalruatfela ten bul an ṭan a, Bengaluru lamah Lalremtluanga Fanai chuan bul a ṭan bawk.