Chawnpui tan Ramhlun South an u hret

MBOCWWB ADFA Inter Village Football Tournament 2026-ah Chawnpuiin boruak nei lian ve viau mah se inkhelh thiam Ramhlun South an hmachhawn meuh chuan an phan a chang tawk lo tih a lang. May 4, Thawhṭanni zan inkhelah Ramhlun South-in Lalawmpuia hattrick hmangin Chawnpui 3-0 in an sawp a, semifinal-ah Lengpui hnehtu Sihphir Venghlun an hmachhawn ang.

Ramhlun South captain Malsawmfela'n goal khung lo mah se goal hmasa ber luh theih nan a thawh hlawk. Sawmfela hian Lalrinchhana tan ball ṭha bik a thawlh sak a, Rinchhana'n khung thei lo mah se a per hi Lalawmpuia'n a khung. Opa hian minute li hnuah goal ropui a khung a, box pawn aṭangin a pet kum lut a, Chawnpui keeper dem theih a ni lo.

Coach Lalnunmawia (Mawitea) enkawl Ramhlun South-in first half-a goal hnih an khung avangin inrintawkna an ngah sawt a, minute 66-naah Opa'n hattrick siamin 3-0 in inkhel a tawp.