Forest B team ngam lotu Chelsea!

Premier League tlak hlau mah se, Nottingham Forest-in Europa League semifinal second leg an khelh a ngaih avangin Chelsea lakah an neih ṭhat ber an thawhchhuahpui lo a, coach Vitor Pereira-a'n an match hnuhnung ber aṭangin player pariat ngawt a siksawi.

Heti chung hian Chelsea tan chuan Forest an la ṭha lutuk hret a, Stamford Bridge-ah mikhual team hian 3-1 ngawtin Blues an hneh - Forest hi EPL-ah an him tawh tiin a sawi theih.

Forest tan Taiwo Awoniyi chuan goal hnih ngawt khungin, Igor Jesus chuan goal khat a thawh ve bawk a, Chelsea tan Joao Pedro chuan goal khat khung ve mah se, Blues mualpho lutuk tur chhanhimna chauh a chang tawh.

Chelsea hian coach Liam Rosenior an ban hnuah Calum McFarlane chu coach lailawk atan an ruat a, FA Cup semifinal-ah Leeds United chu 1-0 in paltlang mai mah se, Premier League-ah erawh boruak dang an tem a, Forest meuh pawhin Stamford Bridge an hlau ta lo.

Forest hian goal khung turin hun an mamawh rei lo. Winger Dilane Bakwa chuan Chelsea defender Marc Cucurella a paltlang hnuah Awoniyi tan a siamsak a, inkhel ṭan aṭanga minute hnihna lekah Forest-in goal an khung.

Minute 15-naah Forest tan goal hmahruai khungtu Awoniyi chuan Malo Gusto lakah penalty a hlawh chhuak a, a pet tura Igor Jesus lo pen chhuakin, goal-ah a chantir.

Blues tan Enzo Fernandez-a'n si phurh sutna remchang nei mah se, post a tihper a, hetihrual hian Forest tan Jesus-a'n a hun ṭha neih a chhawr thei bik lo.

Chelsea hian Jesse Derry hmangin penalty an hlawh chhuak zui - kum 18 mi academy winger tan Chelsea senior team-a bul a ṭan hmasak ber a ni a, mahse, Forest defender Zach Abbott nen an intauhna lamah player pahnih hi lakchhuah an ngai ve ve.

Blues tan Cole Palmer-a'n si phurh sut ṭhenna hun duhawm a nei a, mahse, English midfielder penalty pet chu Forest goalkeeper Matz Sels chuan ṭha zetin a dansak - Chelsea an vanduai.

Chelsea an tho dawn emaw tih laiin, second half ṭan aṭanga minute sarihna lekah Forest bawkin goal an khung a, Morgan Gibbs-White-a cross chu Awoniyi chuan goal-ah a chantir a, 3-0 a ni.

Hun pek belh minute thumnaah Blues tan Joao Pedro chuan overhead kick hmangin, mawi zetin goal khung ve mah se, scoreline cheimawina bak a tling lo a, Blues fans tam takin stadium an chhuahsan tawh avangin he goal hi an hmu lo bawk!

Premier League match ruk zet chu a zawnin Chelsea an tlawm ta a, November 1993 hnua an chak loh zawn rei ber a ni - Pedro-a'n goal khung lo se, an club chanchina a vawi khat nan goal khung loin league match ruk a zawnin an tlawm hial ang.

Chelsea an tlawm leh tak avangin season tharah Champions League an khel dawn lo chiang a, match thum chauh khelh tur awm tawhah point 10-in pangana Aston Villa an phak lo.

Villa hian Europa League nomawi chawi se, league-ah pangana niin season khar bawk ta se, parukna tan pawh UCL a khelh theih dawn tihna a ni a, mahse, table-a pakuana Blues hian point liin parukna Bournemouth an la phak lo cheu!