Wemby triple double a tawk lo

NBA Conference semifinals chu nimin zing aṭang khan khelh ṭan a ni a, San Antonio Spurs tan Victor Wembanyama chuan triple double siam mah se, a team a chakpui zo lo a, 104-102 in Minnesota Timberwolves an hneh lo a, Wolves-in game 1 an la.

Frost Bank Centerm, San Antonio-a inkhelah team pahnihte an inhnehtawk a, inkhel ṭan aṭangin a chungnung zawk an awm bik lo a, Wemby langsar nghalin minute hnih chhungin block vawi hnih a nei nghal. Hma inhruai chhawk zak zakin first quarter-ah 24-23 in Wolves-in hma an hruai.

Second quarter-ah pawh an point a la inthlau lo a, Spurs-in hmasawn hretin 45-45 in chawlhlawk an hmang. 72-69 in Spurs-in third quarter an khar a, Wemby bakah Keldon Johnson te an khelh ṭhat avangin an chak a rinawm hman.

Mahse Wolves-in Anthony Edwards an nei a, playoff tawp lama inhliam Edwards hian a dam tawh tih lantirin a team a thawhchhuahpui a, point kuain a team hma a hruai falpui hman. 104-102 a nih laiin hun tawp dawnah Julian Champagnie-a'n three points a vawm lut thei lo a, a tlawm zawkah an ṭang.

Spurs tan Wemby-a'n point 11 leh block 12 zet a nei a, rebound vawi 15 lain triple double a siam a, NBA chanchinah playoff match khata vawi 10 block nei tling thei zinga palina a ni chiah. Wemby hma hian hetiang ti thei hi Hakeen Olajuwon, Mark Eaton leh Andrew Bynum te chiah an la awm.

French center hi Harper (18), Champagnie leh Stephon Castle (17) te khel chhe lo mah se an vanduai ṭum an tawng a, point hnih lekin an chak lo. Wolves tan Edwards (18) bakah Julius Randle (21) leh Rudy Gobert te an ṭangkai a, Gobert leh Randle te hian Edwards an thlawp ṭhat bakah defence-ah an ding khawng ṭha a, Wolves chak nan an thawh hlawk hle.

Wolves leh Spurs te hi May 7, Ningani zing dar 7:00-ah an inhmachhawn leh dawn a, Wolves-in game tam khelh ngai loa tlang an tum dawn a, Spurs pawh champion rinkai zinga mi an nih avangin chak ngei an tum tawh dawn a, inkhel hmuhnawm a beisei ngam.

Inkhel dangah New York Knick chuan 137-98 in Philadelphia 76ers an hneh a, Knicks hi Jalen Brunson hoin an 'blow out' chiang hle a, an inthlauhni hi point 39 zet a ni. team pahnihte hi May 7, Ningani zing dar 4:30-ah an inkhel leh ang.