Roma UCL beiseina a la bo lo

Italian club hlun AS Roma chuan season thara Champions League khelh an beiseina chhi nung zel turin, Thawhṭanni zan khan tlak hlau Fiorentina 4-0 in an sawp a, table-ah panganaah an chho.

Thawhṭanni zan inkhelah hian Roma tan Gianluca Mancini, Wesley Franca, Mario Hermoso leh Niccolo Pisilli ten goal khat ṭheuh an khung a, Fiorentina-in goal an khung ve thei lo.

Roma an chungnung

Stadio Olimpico-a inkhelah mualneitu Roma an hlauhawm nghal a, minute 10-naah Aston Villa aṭanga an hawh Donyell Malen-a'n goal bar a pet pet nghal.

Minute hnih hnu lawkah Mancini-a'n corner aṭanga tauh lutin a team ham a hruaipui a, Fiorentina defender ten Mancini an ven ṭhat tawk loh avangin keeper David De Gea tan dan ngaihna a awm lo.

Roma an phur laklawh a, minute li hnu lawkah Brazilian full back Wesley-a'n mawi takin a pet kual lut a, an goal hnihna ni tur leh Roma hmahruaina a belhchhah.

Gian Piero Gasperini nauten an la duhtawk mai lo a, minute 34-naah goal an khung belh. Manu Koné-a'n goal line hrula ball a khalh hnuah cross-in, Hermoso-a'n hnai tak aṭangin a pet goal a, 3-0 a chawlhlawk hmangin Roma-in first half an thunun hneh hle.

Second half-ah Roma-in hma an sawn hret a, Riccardo Braschi leh Manor Solomon ten chance an nei nghal. Mahse goal hmaah an hriam tawk loh avangin an siphurh an sut thei lo.

Dutch forward Malen-a' goal khung thei lo mah se a ṭhiante tan a siamsak tho a, minute 58-naah Pisilli-a tauh lut tur chu a ke aṭanga chhuak a ni. Goal hmaah Malen a vanduai a, a vanneih zan ni se goal khung thei tur a ni.

Hello UCL

Hnehna an chan avangin Roma hian Como an lehpel a, panganaah an chhoin palina Juventus nen point khat chiahin an inthlau. Serie A-ah match thum chiah khelh tur a awm tawh a, Roma hian Juve chetsual an chân a ngaih bakah, an chak tluan a ngai dawn.

Roma hian UCL an khelh hnuhnun ber chu 2018/19 season daih tawh kha a ni a, round of 16 thlengin Porto hneh loin an tla. Kum ruk hnuah Europe inelna sang bera tel tur hian beiseina sang tak an nei a, khel pha tur erawhin an chetsual a thiang tawh lo thung.

Hetihlai hian Fiorentina erawh 16-naah an awm a, 18-na Cremonese-in pawhthlak theih dan la nei mah se an tlak a rinawm tawh loh. Nizan vek khan Lazio chuan 2-1 in Cremonese an hneh a, Lazio tan Gustav Isaksen leh Tijjani Noslin ten goal an khung a, Cremonese tan Federico Bonazzoli goal khung chuan awmzia a nei thui lo.