Republic Vengin BVT an hneh nawn

7th May, 2026

Bethlehem Vengthlangin CYMA Football final-ah Republic Veng an hneh lo a, Inter Village Football-ah phuba lak ngei an tum. Mahse, Lalsangzuala Hmar kaihhruai Republic Vengin BVT lakah zahngaihna an lantir lo a, inelna zawnin an hneh.

Thawhlehni zan boruak nuam tak hnuaia inkhelah football thiam leh tui veng pahnih an inhmachhawn a, entu pawh an ṭhahnem hle. Republic Veng tan H. Lalfakzuala'n goal awmchhun a khung a, goalkeeper RS Lallawmzuala che ṭha bawkin 1-0 in hnehna an chang.

Quarterfinal fixture pawh zawhah Republic Veng leh BVT inkhel en a châktu an ṭhahnem a, Inter Village Football Tournment pawh a nun phah sawt. BVT ṭantuten kawr eng an ha a, Republic Veng lamin kawr sen an ha thung.

BVT lamin chance an insiam nghal a, inkhelah erawh chungnung zawk an awm lo. Box chhungah BVT-in indirect freekick an hmu a, captain Emmanuel Lalhruaizela'n a hmang ṭangkai thei lo. Player nei ṭha zawk Republic Veng an insiamrem a, inkhelah an chungnung hret.

Minute 27-naah defender ṭha Laltluangliana'n tawnhriat nei ṭha Lalrammawia ball a chhuhsak a, goal lamah khalh phei nghalin a ball pek ṭha chu Faktea'n a khung. Republic Veng tana goal khungtu Faktea hi Subroto Cup-a Mizoram champion pui tawhtu H. Lalnunmawia fapa a ni.

Republic Veng tan captain Lalnunzira leh Hmangaihkima te a khelh ṭhat avangin first half an thunun zui a, vanneih ṭum ni se goal khung belh thei tur an ni. Hmangaihkima'n ball pet goal pawnah chiah a kal a, Zirtea pet keeper-in ṭha takin a dansak a, Tluangliana'n hnai tak aṭangin a khung lo.

Second half ṭantirhah Lalruatliana Sailo (Tawia) kaihhruai BVT an rawn insiam ṭha a, chance ṭum thum vel zet rawn insiamin an hmang ṭangkai thei lo vek. Man of the match-ah RS Lallawmzuala thlan a ni a, BVT-in Republic Veng tan buaina an siam tih a chiang.

Chutihrualin Republic Veng pawh goal khung belh theih dinhmunah an ding a, box chhungah F. Lalrinpuia titlu mah se penalty pek an ni lo a, Zirtea'n crossbar a pet per bawk. Inkhela chungnung zawk Republic Vengin 1-0 in hnehna an chang a, coach Lalsangzuala Hmar hoin champion an beisei chhunzawm zel.